ohelene syr +

Pysjamaspose kan vel forresten vere noko heilt anna enn dette når eg tenker meg om – ein pose til å ha pysjen i. Men dette er altså ein pysj med pose i staden for bein. Eg har brukt eit mønster til omslagsjakke som utgangspunkt øverst og endra litt på det. Håpar det blir eit praktisk plagg sjølv om det ikkje er opning nederst. Det kan eg evt. endre om det visar seg å vere nødvendig. Evt. sy ein til…

Posen/pysjen er sydd i ullstoff frå naturesfabrics. Skikkelig mjukt og godt. Eg har òg sydd eit par ørsmå vottar etter modell frå nokre eg kjøpte ein gang frå Ullrik (men som no var hullete etter oppbevaring frå sist gang dei var i bruk). Eg tenker dei skal få bli brukte med saumane ut for å vere mjukast mogeleg.

Eit sett i velour etter mønster frå Ottobre 1/2005. Størrelse 62, men min erfaring med klede sydd frå Ottobremønster i forhold til kjøpetøy er at det er litt stort. Grøn er ikkje min favorittfarge i utgangspunktet, men eg syns dette vart nokså fint likevel.

Her om dagen sydde eg ei bukse i jesery med kantar i ribb. Dette er verkeleg fargar eg fell for for tida!

Omslagsjakke i ulljersey vart det òg tid til her ein dag. Veit ikkje om den kjem til å bli så mykje brukt. Ullstoffet er litt stivt og bånda var ikkje dei rette (stive skråband). Får sjå korleis den kjennest ut etter vask. Har tenkt å bruke same mønsteret til å sy ei jakke i mjukare ullstoff.

Minsten har òg fått seg ei bukse sidan sist eg posta noko i bloggen. Ei bukse i restar av isoli. Den har eg ikkje klart å få tatt bilde av mellom kvar gang den er i vask. Den har vore med to dagar i barnehagen alt denne veka. Er vel eit greitt kompliment det.

Det er bleier og tilbehør det går mest i her for tida og då er det det eg kan vise fram.

Først ut er ei lommebleie med microfleece innside og PUL (plastlaminert stoff) som utside. Har sydd eit innlegg av bambus til å ha inni, men elles kan ein vel stappe det meste inni denne typen bleier etter kor mykje oppsugingsevne ein treng har eg forstått. 

Eg har strikka eit ullomslag og farga det med KoolAid (saftpulver). Farga noko anna først (ein ullhals) så fargen vart ikkje så veldig mørk. Men fin syns eg. Omslaget er strikka etter mønsteret ”Plain Wrap” og er eit gratismønster. Trur eg fann det på eit tøybleieforum; ja det finst eigne forum fortøybleiebrukarar! Eg har strikka det i Trysilgarn/Sportsgarn frå Europris. Akkurat eit nøste går med av dette i minste størrelse. Er straks ferdig med eitt til i samme garn, men i mørk turkis. har sydd på borrelås på dette og skal lanolinisere alle ullsperrelag når det nærmar seg litt meir at det skal takast i bruk.

Det siste, og som er sydd i dag, er to små ulltruser. Tenker å lanolinisere dei og bruke dei som sperrelag utenpå brettebleier. Desse farga eg med grøn KoolAid. (Tenk at nokon faktisk drikker saft som har så sterkt fargestoff i seg!) Mønsteret er frå nett og dei er sydde i ein kombinasjon av ull jersey og ull interlock frå naturesfabrics.com. Eg syns sjølv dei vart kjempetøffe og søte! Størrelsen er meint å passe til ein nyfødd. Lurer på om dei er litt lave, så eg tenker å sy eit par stykker som er litt høgare for sikkerhetsskuld. Dei kjem eg til å sy i berre jersey og med dobbelt stykke òg i sjølve buksedelen.

…iallefall etter eigen standard. Eg vurderer nemlig seriøst å bruke tøybleier til babyen. Eg har sydd nokre alt-i-eitt (AIO) bleier litt sånn for å sjå kva det går i, men tenker å prøve brettebleier med ullbukse utenpå til å begynne med.

Alt-i-eitt bleiene er sydde i bambus, PUL (plastbelagt stoff som skal puste) og sprekt mønstra flanell. Ikkje akkurat billige stoffer, så eg håpar vi får nytte av dei. Eg sydde ei bleie etter mønster frå Ottobre først, men den verka merkeleg i passforma og er blitt “resirkulert”. Desse med mønster frå Wee Weka verka mykje bedre. Med borrelås på ulike plassar ser det ut som om den skal kunne passe i ulike aldrar (størrelsar).

I går kveld fann eg så fram noko lanolingarn (Nøstebarn?) som eg hadde liggande og strikka ei ullbukse etter mønster frå nettopp Nøstebarn. Ei veldig rask bukse å lage så eg er i gang med ei til, men den prøver eg å strikke med heile buksa i ribbestrikk. Eg strikkar begge i den minste størrelsen. Om eg har garn igjen når sjølve buksa er ferdig skal eg strikke på nokre korte føtter òg.

Snor i buksa får kome seinare når eg ser om eg har garn igjen av dette garnet eller om eg må finne eit anna alternativ. Silkeband t.d. Babyteppet er òg ferdig, men tubesokkane sliter eg litt meir med. Litt kjedligare å strikke og så krev det litt meir konsentrasjon enn eg ofte har på trøytt kveldstid.

Minstejenta ynskte seg å få sy dokke til jul, så vi gav henne eit materialsett til waldorfdokke. Naturleg nok var det mykje som vart for vanskeleg for henne, men ho har fått vere med på det som ho kunne klare å gjere sjølv undervegs.

I dag fekk dokka augo og munn og til slutt hår. Klede måtte eg òg lage sidan vi ikkje har dokker (eller klede) av denne størrelsen frå før. Dokka er ca 30 cm lang. Eigaren av dokka har alt bestilt “ein pose” med klede til henne, men eg tenker at ho skal få lov til å prøve seg på litt dokketøy-laging sjølv etter kvart.

Vi brukte framgangsmåten frå Sløyddetaljer.

Det er stadig vekk krabaten i magen som blir tilgodesett med alt av mammas håndarbeidstid. Nesten iallefall. Har på gang ei Waldorfdukke saman med mellomsta, men den får vi vise fram når den har fått fjes og hår – om vi (les: eg) får det til.

Denne buksa er strikka i str. 0-1 år etter mønster frå Nøstebarn. Til heimreisa frå føden kanskje?

Eg driv og strikkar sokkar som skal vere til og kanskje klarar eg til og med ei eller anna slags jakke før mars.

Sokkane kan du sjå her i strikkekorga mi. Det er tube-/spiralsokkar uten hæl. Mulig dei blir litt for store til ein nyfødd, men eg skulle vel klare å finne andre ting å ha på føttene til den lille om så er… Det andre som ligg i korga for tida er eit ullteppe i babyull. Eg har strikka fire slike før i år og dette blir altså det femte, påbegynte iallefall. Å få det ferdig i 2009 kan eg berre gløyme. Eg strikkar teppet av 300 gram garn så det blir stort og godt. Strikka frå hjørne til hjørne.

Her er dei fire andre teppa eg har strikka i år. Dei to øverste er fast med i senga til minsten medan jentene sine slenger litt meir rundt.

I går sydde eg denne “veksebodyen” etter mønster frå Ottobre 1/2004. Halsen henta eg frå ein annan body då eg ville ha konvolutthals. Er litt spent på korleis den er i størrelsen. Har satt inn tre sett med knappar slik at den kan regulerast etter som babyen veks.

Stoffet har eg kjøpt på nett ein eller annan plass. Frå USA trur eg. Ribben på ermene er frå Stoff og Stil. Eg kjem nok ikkje til å sy fleire slike før eg har fått prøvd den ut. Lyseblått skal kunne passe til både gut og jente sidan vi ikkje veit kjønn på babyen i magen.

Vi er godt over halvveges i ventinga på vår lille magebuar og eg har kosa meg med å lage litt meir mjuke ting til han eller henne. Teppet i tofarga fleece frå Michas stoffeche var det første eg laga av dette. Teppet kanta eg med eit blomstra bomullsstoff.  Eg syns ikkje eg vart heilt heldig med å runde av hjørnene, spesielt sidan eg ikkje skråklipte kantbanda. Men no får det vere som det vart. Eg har teke opp att tre av blomstene frå bomullsstoffet og brukt som applikasjonar på teppet.

Den brune lua er sydd etter mønster frå “Barnetøj du selv kan sy” men uten lister inni. Størrelse 3 mnd. Tøyet er ein blanding av bambus og bomull frå Bamboo Fabric Store. Omtrent i t-skjortetjukkelse.

Tøyskoa er med inspirasjon frå ei oppskrift som ligg ute på forumet tettinntil. Eg har modifisert oppskrifta litt sidan eg ikkje ville ha meir skøytar enn nødvendig på innsida. Innsida er difor i berre to stykker. Utsida er òg endra litt. Mellom anna med ei list som går over heile høgda framme. Foret er i ullfilt og utsida er i ein kombinasjon av (litt for tunnt?) bomullsstoff og skinn. Håpar dei blir gode å ha på. Sålen er omtrent 12-13 cm lang, så dei passar vel ikkje sånn heilt med det samme.

Desse lammeskinnstøflene er tenkte til småtten i magen. Ca 9,5 cm lange i sålen reknar eg med dei passar med det samme han eller ho kjem til verden. Varme føtter er viktig – og sjølv om både mars og april er vårmånader er eg sikker på at dei kjem godt til nytte.

Smekka/halstørkledet er etter mønster frå AOH nr. 3/2007. Modell nr. 29. Jersey framside og fleece bakside. Dobbelt opp med trykknappar gjer at den kan brukast lenge. Ingen av dei tre ungane vi har no har gulpa i stor skala som babyar så eg forventar ikkje det denne gangen heller, men den kan godt duge som halstørkle på litt kjølige dagar.

Blogging har ikkje blitt prioritert frå meg på lang tid, og det har heller ikkje blitt sydd så mykje her heime. No ser det imidlertid ut som om inspirasjonen er på plass igjen. I mars (kanskje april) blir vi seks i familien og den lille må jo få litt heimesydd. Når eg så syr til ein liten baby som ikkje ein gang er fødd, blir det til at dei tre som skal få ein lillebror eller ei lillesøster òg må få eit og anna plagget.

Buksa er sydd til eldstejenta frå mønster i Ottobre design nr. 4/2006. Modell nr. 37 i størrelse 140. Eg har ikkje fått henne til å prøve den enno, men eg håpar den passar. Modellen skulle syast i “fritidstyg”, men eg sydde den i dongeri med jerseykantar. Håpar den er god å ha på. Litt kjedelige fargar, men så kanskje ikkje “alt” av flekkar visar på den heller. Eg starta på denne i god tid til skulestart, men har ikkje brukt tid på den før no. Når ein så først kjem i gang tar det plutselig ikkje så lang tid å få det ferdig.

Pysjamasen/sparkedrakta uten fot er sydd etter mønster frå det nyaste Ottobre design, 6/2009. Modell nr. 3. Størrelsen er 62 sidan mine barn sjeldan har brukt mindre tøy enn det. Den har konvoluttopning i halsen og trykknappar i skrittet. Gledar meg alt til å sy meir til den lille krabaten som eg alt kan kjenne røre på seg innimellom. Lurer på å la modell 4. i samme blad bli neste prosjekt. Ei selebukse med vide bein. Evt. sy den i velour med ribb nede og i minste størrelse.

Sidan vi ikkje veit kva kjønn babyen er merkar eg at eg blir litt opphengt i at det skal vere kjønnsnøytrale fargar. Ikkje slik at det ikkje blir raude eller blå plagg, men jammen har eg mykje veldig rosa og “jentete” stoffer liggande. Kanskje eg må prøve å bytte til meg litt meir nøytrale stoff…

To par pelstøfler ca 12 cm lange etter ynskje frå ein venn av familien.

Sydde i “Islandspels” frå Skinnlåven. Navnebandet er i møbelhud – samme som eg pleier å bruke til skinntøfler uten pels. Søte små tøfler. Nesten så ein ynskte ein hadde så små føtter så ein kunne putte dei inni.