13 okt

Baby i hus og tid til alt anna enn blogging

2013-10-12 11.34.13

Tida fyk med baby i hus (og dei krev litt tid dei fire andre òg). Eg tenker innimellom at eg skulle nett ha blogga ditt og datt, men så er tanken borte like fort som den kom. Eg har imidlertid laga både det eine og det andre sidan sist blogginnlegg.

Eg har sydd ein del av ulla eg kjøpte på Janusfabrikken. Ei jakke i Krinkelull – med ulljersey i hetta. Eit favorittplagg allerede. Eg lurer imidlertid på å ta litt av på ermene for at den skal vere meir passelig no.

2013-08-09 19.38.51

Av ulljersey har eg sydd mellom anna tre bodyar, tre bukser og ein heildress i litt ulike fargekombinasjonar. Bodymønsteret er laga med deler frå ulike mønster og buksa eg har sydd er ein enkel tights frå Ottobre.

2013-09-21 14.09.22 2013-09-22 10.36.012013-09-22 10.38.11

Buksa som eg bidrog med i boka “Handmade” er komen heim etter å ha delteke på lansering av boka og er teken i bruk her. Eg trudde denne var sydd i str. 70/80, men i og med at den ikkje er i elastisk materiale passar den godt til minstemor på rundt 65 cm, og eg trur den blir nokså stram før ho blir eitt år (80). Dvs at det sikkert er lurt å gå opp i størrelse om ein syr i stumt materiale.

2013-10-01 16.16.58

Vetlesysta som går i barnehagen trengde sårt nye tøfler, og denne gangen tegna eg rundt foten hennar som utgangspunkt for sålen. Blir vel fotformsko det ;) Ho ville helst hatt rosa tøfler, men sidan det ikkje var rosa pelsskinn i haugen min godtok ho brunt med kvit pels. Eg har òg skore til skinn til tøfler til minstemor, men eg ventar på å få tak i strikk til dei før eg syr dei sammen. Ho skal få modell med høgt skaft i burgunder pelsskinn. Planlegg å prøve ein liten ny vri på denne sidan den høge modellen enno ikkje er heilt slik eg vil ha den. Skinnet er som alltid Islandspels frå Skinnlåven på Hønefoss.

2013-10-07 20.12.44

Non-stop-top har eg strikka fleire av tidlegare. Eit greitt mønster som ikkje gir alt for mykje hovudbry. Denne gangen strikka eg i Kauni (EQ/Regnbogefarga) og pinne nr. 3. Eg hadde tenkt sist eg strikka denne at eg skulle lage halsen rundare framme, men gløymde det igjen. Neste gang… Det eg imidlertid gjorde var å strikke inn tre kortrader over nesten heile bakstykket nederst i ryggen slik at den er sidare bak. Eg strikka òg inn ei hullrad nede. Den har dobbel funksjon. Pynt og knapphull. Knapphull til å feste bodystykket som eg òg laga til ekstra utenom mønsteret. Minstemor er ikkje så lang i ryggen enno at bodystykket hadde så mykje for seg, men eg syns det var grueleg lurt påkome ;)

2013-10-12 11.34.13

Ho lyt få fleire slike vestar/kjolar og sidan eg har som mål å få til ein bedre hals på denne bør eg gjerne berre legge opp på nytt mens eg fortsatt hugsar kva eg hadde tenkt :P

12 mai

Småttisklede

Småen i magen begynnar å nærme seg dato for lansering. Noko eksakt dato har han eller ho ikkje klart å gje meg, men så langt ut i juni blir det i alle fall ikkje. I dag har eg vaska opp litt klede for å ha slik i starten og vi hadde klar overvekt av bodyar. Altså passa det perfekt å sy nokre bukser.

Den kvite buksa er sydd av bambusjersey. Ribbekantane er òg ein bambusjersey med litt spandex. Ei tunn og lett bukse som blir fin når sommaren kjem. Ooga booga-buksa er bomull med bomullsribb, og den blå er velour + gul bomullsribb. Dei to lysaste buksene har òg fått seg ei matchande hue. Mønsteret til buksene er det same som eg har bidrege med i boka “Handmade”.

makalaus

Siste kveldane har eg strikka, og rekt opp og strikka litt meir på ei lita bleiebukse i ull. Men no er den ferdig. Oppskrifta er litt Curly Purly og litt berre fri fantasi. Beina vart så lange som eg hadde garn til.

Har visst heller ikkje vist fram dei to bodyane eg har strikka etter Fragaria si oppskrift “Benjamins voksebody“(str. 0-5 mnd). Dei ser, som det meste som er ribbestrikka, kjempelange ut uten unge inni. Den brune er i Islandsk Kambgarn og den kvite i Merinoull frå Nille/Gjestal. Den brune er meir kompakt enn den andre, så eg er litt spent på korleis den er i bruk. Den kvite er i det same garnet som eg strikka lue i tidlegare.

strikkesmaatt

 

No er pinnane tomme her, men garnkassen er ikkje tom så eg skal nok klare å finne på noko som kan vere kjekt å ha til ein liten kropp. Nokre fleire sokkar kanskje. Eller ein vest? Eller nokre små vottar til småkjølige kveldar. Skinntøfler skulle eg jo òg ha sydd, ikkje sant?

 

10 apr

Har du lyst på den nye syboka “Handmade” heilt gratis?

handmade by meEg har tidlegare fortalt at eg har vore så heldig å få vere med i ei ny sybok som kjem ut no i april. No nærmar boka seg med stormskritt, og eg har fått lov til å lodde ut eit eksemplar i bloggen min. Boka er hovudbok i Hobbyklubben  no i april!

Om du vil vere med i trekninga av boka så legg igjen ein kommentar her. Gjerne ein som får meg til å smile ;) Eg har ingen andre krav enn dette.

Trekninga blir gjort den 14. april etter kl 20.00.

 

Her heime går det elles i strikking og litt småreperasjonar på symaskina for tida.

 

kragejakke smart

Kragejakka av Sandnes Smart, men etter oppskrift frå “Strikk til Nøstebarn” nærmar seg ferdig. Eg skulle opprinneleg strikke den av restegarn, men endte opp med å måtte kjøpe tre nøster (dvs. nesten halvparten av det eg trengte). Så no håpar eg jakka fell i smak. Har berre igjen å strikke knappestolpane.

2013-03-29 22.27.31

Eg har òg strikka nokre små søte brune raggsokkar til baby i tunn Abuelita merino multi. Mønsteret eg har brukt til desse er henta frå “Myk Start” og heiter raggsokk til mini og mamma.

2013-04-10 10.43.45

Før eg strikka raggsokkane laga eg eit par “Stay-on Baby Booties” i kvitt. Dei vart litt store med tanke på ein heilt nyfødd, men sikkert gode til vinteren igjen.

 

22 mar

Småplukk til eit lite knøtt

Vi (les: eg) begynnar så smått å kome i reirbyggingsmodus. Det er vel ikkje så rart i og med at våren er rett rundt hjørna ;)

Av plagga her var det første eg laga ribbebuksa i Kauni (EQ og EC). Eg prøvde meg på første gang på å strikke med Magic Loop og første møte med dette garnet. Garnet er greitt nok det, men eg vart skuffa over at det var såpass mange knutar/skøyter på garnet og at eg difor måtte nøste vekk ein del garn på andre beinet t.d. Men stilig vart det jo. Og eg har igjen nok garn til nok eit lite prosjekt eller to. Garnet er ikkje så mjukt at eg vil ha det direkte mot hud – i alle fall ikkje på baby, men til ytter- eller mellomplagg passar det fint.

Ikauniribbebukse

Etter buksa var ferdig la eg opp til eit babyteppe i babyull frå Sparkjøp. Eg strikkar desse alltid av seks nøster/300 gram. Då blir dei store nok til å vere eit teppe som kan brukast i mange år. Alle mine fire ungar har fått minst eitt slikt teppe. Etter teppet strikka eg ei bittelita hue i babyull. Denne tenker eg kan vere fin å ha på baby første timane/dagane uansett årstid.

teppeoghue

I dag har eg sydd ei lita bukse med matchande hue. Størrelse nyfødd 50/60. Eg syns det meste av bukser som er til salgs i butikkane er enten i litt for stivt stoff eller med bein eller… Ein blir gjerne litt kresen av å sy sjølv, men eg har i alle fall planar om å lage fleire slike til babygarderoben. Som ein kan sjå av biletet er det full vår ute :P

elefantsett

15 feb

Karneval og strikketid

Februar er tid for karneval, og sjølv om eg ikkje alltid er like entusiastisk i forhold til krumspring utover kvardagen så prøver eg å stille opp. Når det så er toåringen som skal i veg er krava (heldigvis) ikkje alt for høge. Jentungen ville vere “pus” på karnevalet i barnehagen og det hadde vi ikkje spor av i utkledningskassa vår. Men vi har skinn og vi hadde ein hårbøyle som ikkje var i bruk. Så då sydde eg to doble trekantar som eg tredde inn på hårbøylen.

Kombinert med litt sminke vart ho den søtaste pusen i mils omkrets.

puseoerer

Elles nevnte eg vel nett at eg strikka på Mariusgenser til eldstejenta. No er den ferdig og eg har notert meg eit par-tre ting. Eg burde ha gått ned ein halv pinnetjukkelse til pinne nr. 3 og halsen på størrelse XS vart alt for vid slik eg strikka den. Eg endte med å felle ned til 84 masker, noko eg syns vart passeleg.

Etter at eldsta no har “prøvd” gensaren i eit par døgn har eg endeleg fått den av henne for å få blokka den. Så får vi tru den er tørr igjen til bruk i morgon.

marius med rosa

Ja og så veit eg kva feil eg ikkje skal gjere i mønsterborden om eg skal strikke Marius fleire ganger… Det er ei her som ynskjer seg Mariusjakke i orginalfargane og med glidelås, men eg har ikkje lova noko som helst enno. Blir i tilfelle strikka i Smart.

Eg har òg fått strikka ein liten “sjelevarmer” etter mønster frå Nøstebarn. I størrelse nyfødd. Men så små nyfødde som denne ser ut til å passe til har vi ikkje vanlegvis her i familien. Vi får sjå om den passar, elles er det vel andre (eller ei dokke) som kan ha nytte av den. Søt var den i alle fall. Den er 12 cm breid/høg – men elastisk på grunn av rillestrikken.

sjelevarmer

Tøflene frå førre post har forresten vore i bruk i barnehagen eit par veker alt. No har eg klipt ut pelsskinn til nokre heilt små tøfler, som er så kjekke å ha til barselgaver og liknande.

05 jan

Juleribb(er)

Her i huset er det pinnekjøt det går i i jula, men på hobbyfronten endar eg ofte opp med strikketøy når det er som mørkast ute. Det er då vi er samla alle inne om kveldane og å sitte med strikketøy er tross alt litt meir sosialt enn når eg set meg med symaskina.

Så i desember har eg strikka ribbestrikk. Fyrst ein genser av Pickels Pure Alpaca. Garnet skulle fyrst bli kjole, men praktiske meg endra meining etter ei stund (og så tok strikkemønsteret på stakken på kjolen veeeldig lang tid å strikke) og rekte opp. Og det vart flott som genser! Vetlesysta fekk denne i julegåve frå oss. “Har du strikka den til meeg?!” Kjekt med ungar som blir glade og overraska sjølv om dei har prøvd plagget undervegs i prosessen ;) Dette er ein veldig mjuk og veldig varm gensar.

I romjula strikka eg ein NonStopTop i Nøstebarn-garn (link til mønster i Ravelry – krev innlogging). Nøstebarngarn er ikkje mitt favorittgarn må eg innrømme, til det er det litt for stikketete og stivt (kanskje spesielt etter å ha strikka med Pickles Alpaca), men oppskrifta anbefalar eg. Men det geniale er at på denne blir det berre to trådfester – start og slutt, med mindre du strikkar med fleire fargar. Eg trur den er nokså varm, for den ryker nokså fort av igjen når ho har den på inne.

Eg valgte å strikke bakstykket litt sidare og syns det gjer toppen ekstra fin. Kunne òg tenkt å tatt av to omgangar ved knappen/splitten framme for at den ikkje skal ligge så tett på halsen, så det skal eg gjere neste gang eg brukar dette mønsteret.

Gensaren som eg strikka til jul var litt i største laget til å ta i bruk med det samme, så eg tenkte eg skulle strikke ein ribbegenser til. Denne gangen i litt tunnare garn og altså litt mindre. Denne gangen blir det Abuelita tretråds merino/merino multi. Garnet vart ikkje slik i mønsteret som eg hadde tenkt det oppstrikka, men mjukt og godt er det i alle fall. Denne strikkar eg etter oppskrifta på Ribbegenser i Nøstebarnboka, men i staden for pinne nr. 2,5 og 3 brukar eg pinne nr 3 (bård) og 3,5.

I romjula spurte dessuten eldstejenta om eg kunne strikke henne ein Mariusgenser. Og sidan det er svært sjeldan den jenta spør meg om å lage noko til henne kunne eg ikkje seie nei. Så no vekslar eg mellom ribbegensaren og Marius. Den siste blir i orginalgarnet Sandnes Alpakka.

Men to ulike prosjekt – begge med pinne nr 3,5 – gjer vel at eg får nok av strikking for ei stund. Så då får eg tørke litt støv av symaskina igjen. I det siste har den visst kun fått lov til å bidra med reparasjonar av tøy.

 

06 mar

Toveis

I vinterferien begynte eg på ein “toveis” kjole etter mønster frå Pickles til vetlesysta. Godt mjukt garn og fine fargar, men akk så tidkrevande mønster. Den har dessverre blitt liggande urørt etter at eg kom heim igjen. I kveld skal eg plukke den fram og sjå om eg kan få den til å vekse litt igjen.

31 jan

Oisann

her var det visst lenge sidan sist post. Betyr i grunn berre at dagane fyk utan at eg får prioritert å bruke tid på å blogge. Litt handarbeide har det vorte likevel. Mellom anna har vetlesysta fått seg ein Oslo anorakk i Abuelita multi frå Pickles.

Eg har brukt andre fargar enn i forslaga hjå Pickles sidan eg ikkje hadde nok einsfarga til å bruke same fargen overalt der det skulle vere einsfarga. Vart ikkje så veldig imponert over plagget. Mulig det er meg, men hetta verkar slaskete og eg fekk det ikkje til å stemme frå halsen og opp sjølv om eg hadde rett masketal i følge oppskrifta. Fekk no juksa det sammen på eit vis. Skulle sikkert ha strikka kanten på hetta på ein annan måte men eg gjorde det slik som det stod i mønsteret (med mindre eg har misforstått noko).

Men ei fin “by-jakke” vart det uansett. Har starta på ein “Hudson Hat” i restegarnet (link til kjøpemønsteret på Ravelry – ein nettstad som krev innlogging).

12 jun

For 1500 kroner i garn!

Eg skal fortelle om den o-store-garnhandelen, men først vil eg vise fram nokre skinntøfler som eg har sydd siste dagane. Dei med navn på er forhåpentlegvis snart framme hjå sin nye eigar medan dei tre andre er ledige på markedet. Innermål hhv 11cm (lilla) og 12,5 cm (beige og burgunder). Vetlesysta som er 15 månader snart brukar tøfler som har 12,5 cm fotlengde no.

Buksa som tøflene ligg på er den samme som eg har vist fram her. Eg valgte å sprette av kanten nede og sy den på igjen som ribbekant. Nokså mykje meir praktisk, men kanskje ikkje like stilig. Her har det ført til at buksa har blitt brukt mykje i kjølige sommardagar og eg likte veldig godt korleis den vart sjåande ut.

Og så til garnhandelen. I går fekk eg garn frå svigerinna mi for heile 1500,- kroner! Herleg farge og mjukt og godt.

Pinne nr. 3-4 – 300m/50 g og eg har fire buntar.

1500,- kroner blir forresten ikkje heilt rett – KronUr er meire rett sidan handelen føregjekk på Island. Når man så regnar om til norske kroner har eg forhåpentlegvis ikkje ruinert henne heilt. Eg skal pønske ut eit eller anna ho kan få i bytte, og sidan ho får seg nytt hus etter kvart må det vel vere bruk for eit eller anna sydd der. Garnet skal få bli ein vest/topp (baby i rib eller nonstop kanskje) til vetlesysta – trur eg. Eller kanskje ein kjole/tunika etter inspirasjon frå det nydelige plagget Blomsterpiken har laga.

Kva syns du eg skal strikke av garnet?

28 apr

Kva gjer vel eit par-tre år til eller frå

notteliten4

Ja det er størrelsen på Nøtteliten-rulle-gensaren eg snakkar om. Sidan den vart litt vidare enn den skulle sjølv om strikkefastheita på garnet stemte sånn ca, strikka eg den litt lengre i bolen enn i oppskrifta. Og sidan bolen vart så lang så måtte ermene få bli litt lengre dei òg. Og enno litt lengre. Ja, de forstår kor det bærer hen.

Men gensaren ser ut som ein gensar skal. Og den er stor og god og slett ikkje i størrelse to år som i begge oppskriftene eg har brukt. Bedre med for stort enn for lite likevel!

Av og til kan det bli fint sjølv om det ikkje blir som ein har tenkt. Gensaren var ein ting, og bilder er noko anna. I dette tilfellet bilder teke med mobilkameraet på min Cyber-shot.

Eg skulle ta eit bilde av lungeurten som begynnar så smått å blomstre, men kameraet var mykje meir interessert i å fokusere på blada enn på sjølve blomsten. Så då får det bli slik. Ein “blurr” blå blomst. Lungeurten på nordsida av huset er i år den som er først ute i hagen min av staudene. Det er heilt utruleg at den klarar å vere i gang alt med tanke på at det berre for eit  par veker sidan låg ein meter med snø der bedet er. Faktisk var det først i dag eg kunne rake siste kvadratmeteren med plen og det etter å ha lempa siste snøen ut på grusen!!

25 apr

Nøtteliten

rullegenser

Eg held fortsatt på med prosjektet med å bruke opp ein del av garnet eg har liggande. Dette garnet var kjøpt på Nille til nisselue, men viste seg å vere alt for tynnt (der har du meg og garnkunnskap). Å strikke med dobbel tråd tenkte eg ikkje på, så eg “ofra” eit anna type garn til nisselua (Abuelita tjukk merino). Varmaste og mjkuaste nisselua eg har strikka nokon gang forresten. Men tilbake til dette garnet. Eg har lenge hatt lyst til å prøve oppskrifta til rullegenser i “Strikk til Nøstebarn” og fann ut at tjukkelsen på dette garnet måtte vere sånn ca passelig og mengda omtrent nok til størrelse to år.

Undervegs i genseren vart eg dugeleg lei av runde på runde med raudt raudt og raudt så eg fann fram eit anna mønster eg har hatt liggande ei stund. Eg var nemlig å få overta nokre gamle strikkehefter når mammaen min tømte huset sitt for nokre år sidan og eit av dei var eit Sandneshefte kjøpt i 1969 for 2 kroner og 55 øre! Eit av mønstera heiter Nøtteliten og borden oppe er kjempesøt. Sidan masketalet stemde rimelig bra hoppa eg over på dette mønsteret frå eg satte alle maskene inn på samme pinne og kjøpte eit nøste med offwhite garn til dette formålet. Kanskje blir det nok igjen av både raud og kvitt til å strikke ei matchande lue? 

Eg er ingen ekspert på mønsterstrikk, men det blir sånn passe javnt og fint. Gledar meg uansett til å kle jenta mi i denne til vinteren igjen.

24 apr

5års bloggjubileum og litt action

heildress

5 år med blogging på ohelene.net har det blitt! Eg blogga ei stund før det òg, men første post som vart skriven i denne bloggen vart skriven 24. April 2006. Den gamle bloggen eg nevner i den posten er borte-borte-vekk, slik det jo er med Internett. Noko vil ein gjerne skal bli borte og det blir der “for alltid” medan andre ting plutselig er vekk.

Og her er actionbilder av heildressen til mellomstejenta mi som lova.

Og eit lite bilde av zebragenseren på. Modellen var ikkje heilt samarbeidsvillig men eg fekk no fanga henne på film i forbifarten.

14 apr

Zebra, Viking og Ninjago

nonstop

Den lilla vesten har eg strikka av garn eg hadde igjen etter eg strikka “Thesas Baggy lue” til eldstejenta. Garnet er Viking superwash og mønsteret er Non-stop trøya størrelse 0-2 år. Denne legger eg nok bort til å ha til hausten eller vinteren igjen.

Zebragensaren er strikka av nesten eit nøste med Opal Zebra. Eg brukte masketalet frå Non-stop trøya, men la opp tjue masker mindre framme og la desse opp etterpå ved å legge opp to og to ved kvar vending til eg hadde masketalet eg skulle ha. Halsen vart litt sånn “trappe-aktig” så eg burde muligens lagt opp på ein litt annan måte, men eg fekk iallefall ein litt lavare hals framme slik eg hadde lyst til. Eg har elles strikka ca halve ermene og eit breidt stykke nede på bolen med eit nummer tynnare pinne for å få ein gensar som kan brukast lenge med oppbrett. Pinnar hhv 3,5 og 2,5.

Gensaren er i ca str. 2 år og det står att å feste trådar før den er ferdig. Sjølv om den er meint å passe til to år trur eg nesten vetlesysta kan bruke den alt no. Kalde dagar ser det ut som vi har ei stund til

Prosjekt “bruke opp det eg har” fortset med halv intensitet. Dvs. at eg gir meg sjølv lov til å kjøpe litt materiale så sant eg brukar meir enn eg kjøper. Eg har handla litt stoffer frå Tiljamiid design og Stoff og Stil. Til saman ca 3 meter med stoff (ull, bambus, raud og lilla isoli og eit lyseblått jerseystoff med print). Det eine stoffet er raud isoli som er på god veg til å bli Ninjago-bukse på bestilling frå min kjære son.

I tillegg har eg fått i hus fire buntar garn som eg valgte som del av premien eg vann på nøstebarn sin ullvølkonkurranse. Syrin i fargen og fordelt på to buntar totrådsgarn og to buntar tretråds. Må tenke litt over kva det skal bli til, men litt av det skal eg iallefall ha til noko eg kan bruke sjølv.

25 mar

Juhu!!

Nøstebloggen har hatt ullvøltema og eg meldte meg på konkurransen med ein ullbody som eg hadde sydd om til kjole. Og jammen vann eg ein av premiane! Gavekort på kr 1000,-. Trur det må bli litt garn og eit plagg til meg sjølv. Gratulerer herved alle dei andre vinnarane og takkar for premien.

I gledesrusen ;) deler eg mønsteret på lua i forrige post . PDF-fil. Høgreklikk og velg lagre. Ikkje vær redd for å gi tilbakemelding om mønsteret. Eg har ikkje skrive strikkemønster før.

22 mar

Pompom

Eg syns det engelske navnet på duskar er så artig så difor får det lov til å bli tittelen i dag. Ja, og så handlar det jo faktisk litt om pom pom-ar eller duskar her ;)

Lua i Abuelita tretråds tynn merino er ferdig, og den vart omtrent slik eg ville den skulle bli. Kunne kanskje ha vore ørlitt høgare, men på den andre sida så sit den godt på hovudet slik den er. Eg strikka fletta oppå lua heilt bak til det var berre flette igjen etter at alt det andre var felt. Deretter delte eg fletta opp i tre og strikka tre korte remser med icord over fire masker (auka ei på kvar flette). Litt artig effekt når det ser ut som om fletta løyser seg opp i enden. Og ytterst heng dei varsla duskane. Ein pelsdusk i kvar snorende. Mønster på lua finn du her.

Ung duskedame

Eg har sett at det har vore populært med pelsduskar på strikkaluer. I grunn veldig fint å sjå på, men akk så feil det kan bli all den tid ein ikkje klarar å få på det reine om dyra bak pelsen har hatt det greitt mens dei levde. Å ale opp eit dyr berre for pelsen sin del verkar òg litt råflott. Ja, ikkje flott for dyret, men for oss som skal ha pelsen. Då syns eg det blir noko heilt anna å bruke skinn og pels frå storfe og sau der “heile” dyret blir nytta og det såvidt eg kan sjå er gode levekår for dyra jamt over. Det er iallefall det eg har landa på og det er slikt materiale eg brukar til tøflene eg syr. Av dette blir det så ein del avskjær og i dag brukte eg littegrann til å lage tre pelsduskar til lua eg har strikka. Laga dei på denne måten sjølv om eg mistenker at det er mogeleg å få det enno finare til ved å lage litt innsnitt i sirkelen og sy dei sammen før ein “snurpar”.

Sju år og fotballglad

Ungane laga heilt andre duskar ei helg – på denne måten. Det kom utsegner om at ein skulle lage “tusen” og samle på dei og slikt, men det var visst mest moro med dei to-tre første ;) Iallefall har dei heilt gløymt det no. Og vi har forresten vore fullt opptatt alle mann med å feire sjuårsdag. Ja og ein eittårsdag litt sånn på forskot og ein 41årsdag litt sånn på etterskot og litt ein 9årsdag som vi heller ikkje hadde hadde feira med andre enn husets folk. Så då vart det baking i staden for duskelaging må vite.

Non-stop kjeks er forresten veldig godt – og dei lever farlig dei få vi har igjen no når eg er heime på dagtid.

21 mar

Ingen “dillestrikkar” eg nei

  

Eg skreiv tidlegare at eg tenkte å strikke ein genser/tunika til vetlesysta. Gensar med ein del mønster og fletter. Men eg kjem meg ikkje  i gang med den. Mellom anna er eg usikker på korleis eg best skal auke både først og sist på samme pinnen. Bryte tråden? Heller auke sist på kvar pinne og la det bli litt skeivt? Hm – nei eg passar visst best til litt grovstrikk. Men eg likar ting med litt pynt. Så i staden for å fundere så mykje på gensaren har eg begynt på ei lue i ein rest eg hadde av tynn 3tråds Abuelita merino.

Lua skal vere ei hjelmlue (lue og hals i eitt) og eg strikka heilt rundt dei første to omgangane før eg skrådde biten som blir under haka ved å snu litt lengre bort frå midtpunktet kvar gang (først hhv 1 og to masker før midten og så tre masker frå midten på kvar side hhv ein og to ganger). Etter 5 omgangar strikka eg ein omgang heilt rundt og lukka hulla som vart i vendingane før eg satte dei 15 fremste maskene på ventepinne. Denne pinnen brukar eg òg når eg strikkar fletta midt oppe på lua (over ni masker). Fletta kjem tydligare fram mot  vrangstrikk så eg har lagt inn to vrange masker på kvar side av fletta.

Når eg har strikka luedelen av lua breid nok til å passe rundt hovudet skal eg maske sammen lua eit stykke opp bak før eg strikkar ein spiss bak på lua på eit eller anna vis. Men sidan det er eit resteprosjekt strikkar eg halsen før spissen så eg ikkje kjem til kort med garnet. Planen er å strikke halsen i vrangbordstrikk og auke ut i “trekantar” ned mot ei avslutning med såkalt butterfly-stitches. Dette har gjort før på ei lue omtrent som denne, men den strikka eg i Smart-garn og i rillestrikk.

Bak på spissen har eg planar om sy på ein liten dusk av ein rest av noko heilt anna enn garn – men frå samme sort dyr. Og dusken den ligg klar.

05 mar

“Filtede hjemmesko”

Tova tøfler er kjekke fotplagg og sidan eg aldri kom i mål med jakka eg skulle strikke i Fritidsgarn har eg rikelig med garn til tøfler. I leit etter ei god og enkel oppskrift (hadde ikkje så lyst til å strikke stooore sokkar og tove) kom eg på å søke på Dansk. Det burde jo ikkje vere så alt for vanskelig for meg som tross alt har danske gener iblanda. Grethe Johansen har laga ei god oppskrift som eg alt er i mål med eit tøffelpar etter. Oppskrifta finner du her.

Mine første tøfler i denne oppskrifta er i størrelse 6 år og no er eg i gang med eit nytt par som skal bli ca størrelse 37. Strikking er tross alt lettare å få til å pusle med enn søm medan babyen snart-eittåringen tuslar spring rundt her.

20 feb

Vinterferie og hobbyplaner

Neste veke er det vinterferie her og om vêret blir som i dag så blir det flott å vere ute. Like fullt legger eg planar for inneaktivitetar sidan det tross alt er avgrensa kor mykje utetid ei snuppe på snart 11 månader kan ha i 10 kalde grader som i dag.

Eg kan ikkje nekte for at eg har ein del hobbyutstyr og -materiale. Garnet mitt fyller ein flyttekasse frå IKEA til randen, men der er eg godt i gang med å få brukt ein del. Har berre kjøpt garn med konkret plan to ganger i det siste og no skal eg ikkje kjøpe garn på ei stund før eg har strikka opp ein del meir.

Stofflageret mitt vil det derimot ta lengre å få brukt opp. Ikkje er eg tenkt til å bruke det opp heller. Det er nemleg heilt avgjerande å ha litt å velge i når ein skal sy. Å kunne plukke fram ulike stoffer, sammenligne og så velge for så å kunne begynne med det samme mot alternativet: Først bestille konkret til eit prosjekt for så å vente på å få det heim. [Det er kun ein stoffbutikk her og den har ikkje bekledningsstoffer.] SÅ vente på at det blir klart etter vask, stryke og SÅ kunne begynne å sy. Likevel skal eg prøve å minske materiallageret litt framover på samme måten som eg strikkar meg nedover i flyttekassa. Eg vil prøve å sy meir til meg sjølv (og ungane) heller enn å kjøpe klede ei stund. Eg skal òg prøve å kome meg over vegringa mot å bruke dei finaste stoffene. Blir nemlig ofte til at eg tar andre stoffer enn dei eg helst vil bruke, fordi eg ikkje klarar å klippe i dei finaste. Nokon som kjenner seg igjen?

Materiale til andre hobbyar enn saum og strikking har eg òg litt av men det får eg kome tilbake til ein annan gang.

Framover skal eg prøve å lære meg å bruke noko av det utstyret eg har som eg har brukt for lite til å mestre det godt. Dette er t.d. Clothsetteren til broderimaskina, ekstra føtter til Compulock 888, og noko litt mindre konkret – ulike innstillingar på maskinene som coversaumane på Compulocken.

Broderiprogrammet Embird er òg noko som eg har lyst til å bruke meir tid på, slik at eg kan lage enkle broderi sjølv. Dermed kjem kanskje lysta til å brodere litt meir med 350E enn det eg har gjort siste året.

08 feb

Ingen lause trådar

Å feste trådar etter at ein er ferdig med strikkearbeidet er vel bortimot det kjedligaste ein kan finne på. Ikkje blir det så fint heller å berre skulle sy inn trådane på baksida. På nokre arbeid som skjerf og tepper finst det jo heller ikkje ei bakside. Heldig då at det finst måtar å bytte nøste på som eliminerar trådfestinga!

Youtube har instruksjonsvideoar på ulike måtar å gjere dette på.

Vanligvis når ein lærer å strikke lærer ein å berre la endane henge laust som dette:

Og så sy/veve endanee fast på ein sikker måte etterpå:

Det må ein jo gjere i starten og slutten på arbeide uansett så det er greitt å kunne.

Men så var det å kunne sikre garnet mens ein strikka og unngå for mykje arbeid etterpå. Enklaste måten er kanskje å berre la garnet overlappe nokre sting:
 

Russian Join – fungerer på alle typar garn.

Spit-splicing er ein filte-/tovemetode som på samme måte eliminerer trådfesting i etterkant. Fungerer kun på 100% animalsk garn. Og spytt er visstnok ein nødvendig ingrediens – vatn fungerer ikkje like godt:

Så veit vi det :D

07 feb

Teshas baggy lue

Ja, lua var rask å strikke den! Ferdig like før leggetid sundag kveld. Fargen meir lilla enn den ser ut på bildet, men slik er det gjerne med blitz. Eg fekk lyst på lua sjølv, så avtalen no er at om eg strikkar ei til til henne – i lyseblått garn – så skal eg få denne. Vi får sjå…

Garn: Viking superwash. Pinnar 3 og 3,5. Måtte legge opp ein del fleire masker enn i den orginale oppskrifta.


Eigaren er modell.

05 feb

Ferdig og eit dilemma

Lua er ferdig, men modellen var ikkje spesielt imponert. Var berre såvidt eg klarde å få fanga den med kameraet før ho klarde å rive den av seg. Mulig eg strikkar på snorer og øyreklaffar eller berre snorer.

Men kva skal eg gjere no? I dag var vi og kjøpte garn til lue til eldstejenta i huset og jammen kom posten med garn til tuniken. Hm – det bør vel bli ei lue først. Ikkje lyseblå rett nok. Når vi stod der med garnhyllene var det eit lilla garn ho likte best. Så må vi berre bli einige om eit mønster. Baggy lue etter dette mønsteret går nok fint, men eg hadde lyst til å finne noko som er litt raskare å strikke enn kablar/fletter – spesielt sidan eg skal strikke ei til av samme sorten som denne rosa etterpå. Jentungen falt for Teshas baggy lue så vi prøver på den. Litt tynnare garn enn i oppskrifta, men det finner vi ut av.

04 feb

Mens eg tenkte og mens eg ventar

Mens eg tenkte på kva eg skulle strikke for noko fint (ref. forrige post) vart eg inspirert av nabojenta på 8 til å strikke ribbestrikka nøstebarnvottar. Ja, mora hennar har òg strikka nokre par og eg kunne ikkje vere dårligare. Sant å seie er vottar noko eg aldri har fått til, men desse var enkle og greie og vart gode på. Eg har strikka tre i størrelsane 1-2, 3-5 og 6-8 år. Eg syns dei vart rikelige i størrelsen i det garnet og pinnane som eg brukte – eit ullgarn på spole kjøpt på eit lagerutsalg ein gang. Vottane strikka eg på pinne 3,5/4 og med dobbel tråd. Dei største kunne nesten passe til mi mellomstore damehand. Håpet er at vottane tovar seg litt under bruk og formar seg etter handa som skal ha dei på. Kanskje det blir julegaver? ;)

Når eg så hadde bestemt meg for kva eg skal strikke av store prosjekt neste gang var det brått ikkje så moro å strikke fleire vottepar. Eg dukka ned i flyttekassa (garnlageret mitt) og fann fram to nøster med lyserosa babyull + rundpinne nummer 3,5 og 4,0 og begynte på eit prøveeksemplar av lue etter mønsteret i forrige post. Dobbel tråd. Lua ser ut til å passe til ein eittåring omtrent (som er det størrelsen seier) men eg velger å strikke den litt lavare enn mønsteret. Fem rundingar blir det til slutt. Eg er komen litt lengre enn når eg tok bildet her tidlegare i dag. Eldstejenta mi lurte forresten forsiktig på om eg kunne strikke ei lue til henne i samme mønster, men i lys blå. Vi får sjå kor fort garnet til gensaren kjem i hus – lyseblått garn har eg visst ikkje heller.

02 feb

Eg har lyster

Ja, altså det kan vere så mangt man har lyst til, og eg har nok ikkje verken færre eller fleire lyster enn andre. Men nett no har eg altså lyst til å strikke dette settet frå Norsk Husflid nr. 4 i 2010. Bladet/bildet er litt krøllete av å ha vore passasjer i strikkekorga sidan det kom i hus, men det er altså ein raglangenser/tunika med matchande lue. I oppskrifta er det brukt ein tråd Rauma babyull og ein tråd Plumet (som vel er forsterka mohairgarn etter som eg kan finne ut).

Eg har aldri strikka fletter før (som eg kan hugse) så dette blir moro! Det er berre så kjekt å lære nye teknikkar. Kvitt garn er bestilt frå Spar Kjøp. Eg tar sjansen på eit anna garn enn det som er anbefalt, men skal slite (!) meg gjennom ein prøvelapp først sidan det er eit relativt stort prosjekt. Tenker å strikke størrelse to år og begynne med lua.

26 jan

Eitt nøste her og eitt nøste her

Det blir fort nokre nøster når ein handlar garn på nett. Eg er nok ikkje den største hamsteren når det gjeld garn, men lageret har auka sakte og umerkeleg. Difor har eg bestemt meg for å prøve å lage noko av garnet eg har (og stoffet eg har – men det er ein annan historie og forhåpentlegvis ein annan post) ein periode framover. I tillegg passar strikking førebels bedre å gjere medan babyen er vaken enn søm. Syrommet mitt er ikkje overkommelig å barnesikre…

Buksa er strikka etter mønsteret All-in-one Evie Pants (her finner du link vidare til Ravelry – forumet der du kan kjøpe mønsteret). Ei par nøster Mor Åse, eit halvt nøste Sportsgarn i ein farge og to nøster i ein annan. Kvar for seg meint til tova vottar eller noko slikt. Til sammen vart dei ei pyntebukse som òg kan settast inn med lanolin og fungere som bleiebukse. Ca str. eitt år. Iallefall litt stor til jenta vår som no er ti månader straks.

Eg har òg strikka litt andre ting som eg ikkje har blogga. To gensarar. Begge etter mønster frå Nøstebarnboka. Ein bestefarsgenser i Abuelita tynn merino frå Pickles og ein ribbegenser i Snældan. Ullgarn frå Færøyane kjøpt via Yarn.no. Litt stivt garn, men eg håpar det blir mjukare ved bruk. Begge gensarane vart litt vide i forhold til lengda. Neste gang eg strikkar raglan skal eg strikke frå toppen og ned (og kanskje til og med lage ein prøvelapp).

 

Det siste plagget eg strikka før ullbuksa var ei lita ullue. Utgangspunktet er samme oppskrift som i sist post: Spisslue i rett og garnet er Pickles Extra Fine Merino. Lua passar til ein liten baby. Eg fekk tvinga den på hovudet med omkrets på 45 cm her, men eg måtte innrømme at den var for liten.

03 okt

Eg veit kva eg sa om å skrive oppgåve…

…men garnet var så fint og eg hadde så lyst på litt anna å gjere. Så oppgåva ligg litt på sida nett no. Eg lovar meg sjølv å skrive vidare på oppgåva i morgon.

Eg prøver meg altså på ein ribbegenser med utgangspunkt i “Baby i rib” som eg strikka alpakkavesten frå. Klarar ikkje heilt bestemme meg for om den skal få lengre ermer enn det eg alt har strikka og i tilfelle om dei skal vere 3/4 lengde eller lange. Medan eg tenker strikkar eg ferdig kroppen på genseren.

Garnet er frå Yarn.no: Tanis Fiber Arts – Blue Label og heiter Gem. Nylonforsterka maskinvaskbar merinoull. Eg alternerer mellom to nøster for å få samme mønster etter splitten som øverst på genseren. Om eg skal klare samme mønsteret på ermene òg  så må eg vel alternere mellom tre eller fire nøster (!?) så kanskje det blir til at eg berre feller av…

11 sep

Litt meir strikking

Det har blitt tid til enno litt meir strikking i det siste. Først ut ein vest i ribb av alpakkagarn. Nydeleg og mjuk! Skulle hatt ein slik ein sjølv – men med så tunnt garn er det ikkje til å tenke på å få ferdig eit plagg i vaksenstørrelse for meg.

Eg har òg strikka ei ny ullbukse. Ei selebukse med skråblikk på Ultimate Longies-oppskrifta i sjølve buksedelen (ned til aukinga i skrittet). Den vart kjempesøt på. Berre synd dette garnet nuppar ein del. Har igjen ein rest som eg skal strikke lue av har eg tenkt. Skikkelige friske fargar på denne.

Og så spørs det om eg må ha ein liten strikkepause/hobbypause for å studere litt og skrive oppgåve. Vi får sjå. Det er utruleg kor kjekt alt anna blir når det er noko ein burde ha gjort. Men spøk til side. Sanninga er at eg faktisk gledar meg til å skrive, så eg får skunde meg å jobbe iherdig før lysta går over ;)

26 aug

Sommarstrikk

I sommar har det blitt mykje strikking. Ein hobby som ein kan ta med seg på verandaen og elles rundtomkring der ein måtte like å opphalde seg.

Sidan vetlesysta brukar tøybleier treng ho litt ekstra med ullbukser. Den turkise med lilla striper øverst på bildet passar no, medan den mangefarga underst nok må ligge på vent eit år eller meir. Dei er strikka av garn frå hhv. Stoff og Stil og Discobaby med kanting av dobbel tråd med tynn alpakka. Den spraglete buksa i midten er av Nagano med litt diverse restegarn innimellom og er meint å vere til skuleguten. Den er strikka smal for å kunne passe under regntøy og dress.


I strikkekorga ligg ei påbegynt selebukse i garn frå 100purewool. Eg strikkar litt sånn på innfallsmetoden, men med skråblikk på oppskrifta Ultimate Longies. Eg har lært meg å “alternere” mellom to garnnøster oppe på buksa slik at fargeskifta blir meir likt på overdel og bein og er svært så fornøgd med eige arbeid så langt ;) Gler meg til å tre denne buksa på utenpå tøybleiestumpen til vetlesysta.

Ho har og fått seg ei jakke i løpet av sommaren. Garnet er “Sterk”, som er ei blanding av alpakka og ull forsterka med nylon. Eg brukte oppskrifta “Veksejakke” i Nøstebarnboka men la inn ei rad med vrangbord 1r1v mellom rillene. På denne måten vart det meir struktur i jakka. Meir tidkrevande å strikke og naturleg nok ein del vrangrader å strikke. Men jakka vart både lun og mjuk.

Eg snudde og strikka spegelvendt frå midt bak på ryggen så jakka har fått seg ei stripe midt på ryggen og ulikt mønster på kvar side. Akkurat som planlagt – meir eller mindre… ;)

25 aug

Pickles merino møter Nøstebarn

Denne lua er strikka etter (sånn ca) oppskrifta på barnelue med øreklaffer frå Nøstebarn-boka. Garnet er “ekstra fine merino” frå Pickles. Fargen heiter “Sjokolade” – noko som jo passar litt for godt til meg! Eg syns lua i oppskrifta var veldig høg i panna så eg runda den av litt før oppskrifta seier at ein skal. Garnet er nydeleg og mjukt, og luksusen med å få det rett i postkassa gjer nok at eg handlar der igjen om ikkje så lenge. Eller faktisk har eg alt meir garn på veg heim til meg ;).

14 jul

Fargehobby

Sidan sist post berre  hadde kvite plagg, kjem det litt meir fargerike ting denne gangen. Først ut er ein “koseklut” eller leike som eg sydde her ein dag. Den likar ho veldig godt å leike med, spesielt juksepelsen og lappane. Eg har sydd bånd og lappar rundt heile kanten og lagt inn ein liten pose med plastgranulat i eine hjørna. Inne i leika er det òg ein liten rasleboks frå ei leike som skulle kasserast.

Eg har òg fått strikka litt i det siste. Garnet til denne buksa er frå 100woolpure og i rein ull. Oppskrifta eg har brukt er “Ultimate Longies” som eg har kjøpt via Ravelry.

OLYMPUS DIGITAL CAMERA
Kanten nede syns eg passa godt til ei som enno ikkje er oppe og går på føtene sjølv om buksa er vel stor enno.

09 jul

Buksestrikk og buksesøm i kvitt

Først ut i dagens skryt er ei bleiebukse, som dessverre vart i minste laget. Mjuk og god i dobbel (trippel i skrittet) merino ulljersey. Eg kjem nok til å sy fleire slike, men i litt større størrelse. Denne er det kanskje nokon andre som vil overta? Det er fullt mogeleg å farge denne typen ulltøy. 

Eg har òg sydd ein ullpysj, i tunn blå ulljesery og ei bukse (under) i offwhite ullinterlock. Eg har tenkt å farge denne buksa når eg får tak i kool-aid eller noko anna eg kan bruke.

Det siste eg har gjort ferdig til snuppa er ei kvit ullbukse i Bjørnegarn frå Tre Bjørner. Starten (ned til kilen begynnar) er etter Curly Purly-oppskrifta mens eg vidare strikka kile, maska sammen i skrittet og strikka beina berre på innfallsmetoden. Eg valgte å strikke vrangbord på heile beinlengden. Nederst strikka eg ei hullrad til pynt. Buksa er stor og god enno.

11 jan

Eg er nok litt gal…

…iallefall etter eigen standard. Eg vurderer nemlig seriøst å bruke tøybleier til babyen. Eg har sydd nokre alt-i-eitt (AIO) bleier litt sånn for å sjå kva det går i, men tenker å prøve brettebleier med ullbukse utenpå til å begynne med.

I går kveld fann eg fram noko lanolingarn (Nøstebarn?) som eg hadde liggande og strikka ei ullbukse etter mønster frå nettopp Nøstebarn. Ei veldig rask bukse å lage så eg er i gang med ei til, men den prøver eg å strikke med heile buksa i ribbestrikk. Eg strikkar begge i den minste størrelsen. Om eg har garn igjen når sjølve buksa er ferdig skal eg strikke på nokre korte føtter òg.

trekantbukse

Snor i buksa får kome seinare når eg ser om eg har garn igjen av dette garnet eller om eg må finne eit anna alternativ. Silkeband t.d. Babyteppet er òg ferdig, men tubesokkane sliter eg litt meir med. Litt kjedligare å strikke og så krev det litt meir konsentrasjon enn eg ofte har på trøytt kveldstid.

30 des

Litt strikka og litt sydd

Det er stadig vekk krabaten i magen som blir tilgodesett med alt av mammas håndarbeidstid. Nesten iallefall. Har på gang ei Waldorfdukke saman med mellomsta, men den får vi vise fram når den har fått fjes og hår – om vi (les: eg) får det til.

Denne buksa er strikka i str. 0-1 år etter mønster frå Nøstebarn. Til heimreisa frå føden kanskje?

 

Eg driv og strikkar sokkar som skal vere til og kanskje klarar eg til og med ei eller anna slags jakke før mars.

Sokkane kan du sjå her i strikkekorga mi. Det er tube-/spiralsokkar uten hæl. Mulig dei blir litt for store til ein nyfødd, men eg skulle vel klare å finne andre ting å ha på føttene til den lille om så er… Det andre som ligg i korga for tida er eit ullteppe i babyull. Eg har strikka fire slike før i år og dette blir altså det femte, påbegynte iallefall. Å få det ferdig i 2009 kan eg berre gløyme. Eg strikkar teppet av 300 gram garn så det blir stort og godt. Strikka frå hjørne til hjørne.

Her er dei fire andre teppa eg har strikka i år. Dei to øverste er fast med i senga til minsten medan jentene sine slenger litt meir rundt.

I går sydde eg denne “veksebodyen” etter mønster frå Ottobre 1/2004. Halsen henta eg frå ein annan body då eg ville ha konvolutthals. Er litt spent på korleis den er i størrelsen. Har satt inn tre sett med knappar slik at den kan regulerast etter som babyen veks.

Stoffet har eg kjøpt på nett ein eller annan plass. Frå USA trur eg. Ribben på ermene er frå Stoff og Stil. Eg kjem nok ikkje til å sy fleire slike før eg har fått prøvd den ut. Lyseblått skal kunne passe til både gut og jente sidan vi ikkje veit kjønn på babyen i magen.

24 mar

Dinosaurlue – med ein vri.

Denne er sydd etter mønster på Dinolue i boka “Blødt Børnetøj”. Eg har forlenga taggane med omtrent det doble slik at det vart ein hale bak. Minsten syns den var kul, men vi fekk oss ein nedtur då første utgava var sydd med strekken feil veg.

 dinolue

Eg klipte av taggane og brukte på ny lue, dermed gjekk det rimelig raskt å lage andreutgava. Fleecen er 80% bomull og 20% polyester og eg hadde forventa at den var mindre statisk elektrisk og meir bomullsfølelse, men kanskje det kjem seg etter vask (med rikelig med tøyskyllemiddel).

dinopaa

Sidan eg ikkje akkurat er ein racer på strikking får eg vel lov å skryte litt av ei enkel tvåge òg! Bomullsgarn som eg har fått i ei hemmelig venn gave ein gang. Strikka med ein omgang rett og ein omgang 1rett/1vrang. Eg fekk to nøster av dette garnet og driv på med tvåge nummer to. Eit nøste pr. tvåge.

vaskefille

 

09 mar

Strikkepinneveske etter mønster frå Giram

Eg kjøpte mønster til denne pinneveska frå Giram med ein gang ho la den ut, syns den var berre så genial, og til skilnad frå ein del andre mønster eg kjøper/lastar ned – uforbederlig mønstersamlar som eg er – har eg faktisk sydd frå dette mønsteret! Eg held fast ved kommentaren eg gav Giram med det samme: Veska er genial!

pinneveske pinneveskeinni
Eg valgte eit rikelig mønstra stoff på utsida, men innsida har fått eit strikkemønstra stoff. Inne i veska fekk bambuspinnane mine plass – men det kan vere eg i staden for å bruke den sjølv skal gi denne bort til ei som eg veit strikkar og som ikkje har noko å oppbevare pinnane sine i (ikkje i system iallefall).

19 des

Strikketid – Time for knitting

Jul er strikketid for meg. No er ikkje jula heilt komen, men eg er likevel i strikkemodus. Eg har aldri strikka vottar før (som eg kan hugse) men likevel har eg strikka to par vottar siste veka. Det syns eg at eg kan få skryte av. Dette paret er strikka i Sportsgarn (mørk farge) og Safirgarn (lys farge) og tova nokså hardt. Håpar dei passar til eldstejenta som ynskte seg nye sånne. Viss ikkje må eg vel berre lage eit par til.
votter
For me Christmas is time for knitting. I know it’s not quite Christmas yet, but I have allready started the knitting season. I haven’t knitted mittens before but the last week has resulted in two pairs. A grey pair for me and this brighter pair for my eldest daughter. I have felted it quite hard but hopefully it fits (or I’ll have to make another pair).

02 nov

25 mm rain last 24 hours

Det regnar kraftig for tida. Og det har såvidt vore vinter. Regnmålaren er ikkje alltid å lite på sidan eigaren (eldstejenta på 7) ikkje tømmer den kvar dag, men det har iallefall vore både regn og kaldt siste dagane viss ein skal dømme etter isklumpen frå regnmålaren.

25mm

Ungane nådde til og med å bygge ein liten snømann før snøen forsvann igjen. Iallefall nesten.

kalle

Eg har strikka hals til minstemann (trudde eg) siste dagane. Berre synd han ikkje ein gang ville prøve den på. Ja, ja så får det bli julegave eller noko. Oppskrifta er frå boka “Strikk til Nøstebarn.” Eg må innrømme at eg synda litt mot boka sitt utgangspunkt (ubehandla garn) og strikka den i restar av superwash av ulike typar. Neste hals blir i blå Juvel Multi og fell forhåpentlegvis bedre i smak hos den blå guten min.

halsen

The autumn has been both cold and wet the last week.

The neckwarmer is knitted from a pattern from the Norwegian book “Strikk til nøstebarn” The idea behind the book is to use wool and the superwash kind; but I hade some leftovers to get rid of…

28 okt

Bloggsperre og håndarbeidssperre

men shopping klarar eg visst fortsatt. I går fekk eg desse to flotte bøkene i posten frå danske elounge.com. Forhåpentlegvis inspirerer bøkene meg til å kome i gang med sying igjen. Den siste tida har symaskina nesten berre blitt brukt til å reparere tøy.

syogstrik

I seem to be unable to do either blogging nor crafting these days. But I still manage to shop for crafting books! Look at the beauties I got from elounge. The titles are roughly translatet “Knit and sew – Childrens clothes 0-3yrs/4-10 yrs” Hopefully this is the inspiration I need to start sewing again.

03 jul

Stao no pao! Naughty knitting.

Eg har hivd meg på strikking igjen! “Strikk7 naughty knitting” er eit prosjekt som har som mål å sette strikking på dagsorden. Ein liten del av dette prosjektet er ein konkurranse mellom fotballklubbane Brann og Sogndal (derav “Stao No Pao”) om å strikke det lengste fotballskjerfet. Sogndalstilhengarane (inkludert meg) strikkar altså i kvitt og svart og Branntilhengarane strikkar i raudt og kvitt. Eg kunne vel knapt vore mindre interessert i fotball, men syns dette var litt artig å vere med på. Skjerfa skal etter kvart sys samme og tovast og bli til naudhjelpstepper som skal distribuerast av Røde Kors.

I have started knitting again! I take part in a knitting contest between our local football club and Brann, the fotball club of Bergen. We compete in knitting the longest football scarf! The scarves will in the end made into felted blankets for the Red Cross to give away. You can read more about the “knit7 naughty knitting” project in english here.

19 sep

Babyteppe til ein stor gut. A baby blanket for a young boy.

I kveld vart eg ferdig med teppet til minstemann akkurat i tide til legging. Han godtok det med det samme sjølv om han har holdt fast på at det IKKJE var til han eg strikka teppe når han har sett det undervegs. Teppet er i babyull. Det gamle har han klipt hol i og elles slitt ut ved bruk. Du kan sjå det ved sida av hodet hans. Totalt utslitt! Usikker på om eg klarar å kaste det likevel. At det vart litt brasillignande er kun eit resultat av kva som tilfeldigvis var i garnkofferten.

Eg er fornøgd med å ha laga eit nytt teppe til han sidan nettene begynnar å bli litt kaldare og pysjamasar blir kasta veggimellom.

The new blanket for our youngest was accepted at once when it was finished. While I knitted it he kept on saying it was meant for “the baby” (what baby?). But tonight I finished it just before bedtime and he held on to it even while I was weaving in the ends!

05 jul

Å sy ei strikkeveske – del 1 (Making a knitting bag – part 1)

Dette bildet viser dei ulike delene i veska. Ytter og innerstoff og fôr er klipt ut i identiske delar (dvs. eg reinklipper dei like etter at lommer og diverse er satt på).

Som du ser er innerdelane her ferdige med fôr og lommer – klar til å bli satt sammen. Starten og ein nærmare kikk på lommene eg brukar får du ein annan gang.

Ytterstoffet blir klargjort på samme måte med lommer, men uten fôr  (veska blir finast med foret fast på innerstoffet). Eg startar med å sy sammen dei største sidene og bunnen samt hankar når hankane skal vere på sidene.

Ytterstoffet har del(er) til hank(er) i tillegg til dei andre delene som er inne i veska. Når du skal berekne stoff må du hugse på det. I tillegg brukar eg litt stoff til lommer både utenpå og inni som du kan sjå.

I use identical pieces for the inner and the outer part of the bag. Even the webbing is the same size. Anyway it is similar sizes after I cut everything clean. I usually cut the pieces clean after attaching the pockets. 

Here you can see the outer part just missing the narrower sides. I use this way of assembly when having handles on the sides.

More to come… 

05 jul

Strikkeveske #2 (Knitting bag #2)

Strikkeveske nummer to er ferdig i klar til å sendast til sin nye eigar. Ho er på ferie og må vente litt med å sjå den live. Eg er som alltid spent på reaksjonen når eg syr noko på oppdrag.
Eg var usikker på kombinasjonen av stoff undervegs men syns veska vart skikkelig fin til slutt. Dette er ei veske som tek litt tid å lage, men om du kikkar innom her av og til skal du få heile beskrivelsen til slutt. Eit par innledande rundar følger i dag.

The second of these my very own patterned knitting bags. This one is made for a friend for a swap and she hasn’t even got it yet. I’m as always nervous about the reaction even though I really liked this one (too).

Stay tuned and I will give you a description on how I make them. Maybe not step by step – but in bits and pieces as I remember to take photos of the making of the different bags. (I have orders for two more).

06 jun

Symaskina er varm!

Det er så moro å sy når ein klarar å få ut idear som har tumla rundt i hovudet lenge. Dei siste dagane har eg sydd på det som skal bli ei veske til ei strikkedame. Eg skal lage fleire av desse etter bestilling, men det er berre denne fyrste her eg har direkte tidsfrist på. Når eg har fått denne ferdig blir det lettare å lage dei andre to evt. med små justeringar etter ynskje frå kjøparane. Fargen skal iallefall ikkje vere brun på dei andre to.
Eg har prøvd å tenke som ein strikkar når eg laga den. Inni er det til seks lommer – til garnnøstet (med “løpegang” for tråden ut av veska), til strikketøyet, nøklar og mobil, til lommebok og avtalebok. Og så eit stort hovedrom til alle garnnøsta ein kanskje handlar, ringpermen eller kva det no måtte vere. Det blir fleire lommer også på utsida.
24. juni skal eg stå og selge heimelaga ting i Fjærland på boknatta. Eg satsar på at marerittet eg har hatt ei natt om at eg stiller opp med tre par tøfler og ei veske ikkje slår til. det ligg iallefall litt nedi kassa og eg satsar på å sy mykje dei tre vekene som kjem.

Eg sydde ei ullkrone i dag. Den passa pefekt på fireåringen vår og ifylgje henne var den “fiiin”. Har tenkt dei skal kunne brukast som panneband vår og haust og eg kjem til å lage nokre slike i ulike fargar og størrelsar til messa.

I have been sewing quite a lot the last week. I have orders for three bags for knitters. I have finished the inner part on the first one. Then the others will be easier to make – with or without minor alterations. The exterior on this on is going to be brown with floral details on the outer pockets. Not quite like Amy Butlers knitting bag – but certainly inspired by it (yes, I do have the pattern for that one – and no, this is not sewn from that pattern).

Since I have reserved a table for the book night to sel my homemade goods I have started to think “massproducktion” on a few items. There will be soft leather shoes, small aprons for kids, woolen hats and crowns (like the one my girl is wearing here), quite a few bags and hopefully some neclases.

17 mai

Litt forseinka April-sokkar – April socks.

April sokkane mine var ferdige sånn omtrent i det april var slutt og her er dei. Fargane er delvis valgt av femåringen min. Ho ville hatt ein del fleire fargar, men eg syns det vart mange nok trådendar å feste. Eg laga band også, men syns ikkje det vart fint. Knappar har eg også berre på utsida av vrista – altså berre på eine sida av kvar sokk.

My socks for april in the socks 2006 KAL. The yarn is superwash and not exactly good to walk on… My fiveyearold chose the colours and wanted me to have even more.

25 apr

Aprilsokkar – sokkar 2006

Sokkane for april har fått ligga i ro i nesten to veker. Skal tru om eg blir ferdig med dei før april er omme? Mønsteret er frå soxie.com. Eg har valgt superwashgarn, trur sokkane uansett kjem til å halde ei stund. Sokk nummer ein er ferdig – lurer berre på om avslutninga betyr å sy sammen eller å snurpe sammen. Eg finn det vel ut på Hobbyboden.

My aprilsocks is the from the sandal socks pattern at soxie.com. I use wool superwash and think they will last some time even though this is not a yarn primarily for socks. I still don’t know if I will be able to finish them in April.

03 apr

To ufoar mindre – Two less ufos.

I løpet av helga og i dag har eg laga ferdig to dongeriprosjekter. Begge har vore vist her tidligare. Strikkeveska/-korga i dette innlegget – og trekket til leikemadrassa i dette innlegget (rett nok skulle det bli legoveske).  

Madrasstrekket dekkar ei rund madrass som eg også har laga sjølv. Når vi bytte dobbeltseng (frå 150 til 180) vart det ei overmadrass til overs. Av den laga eg fyrst ei madrass til bagvogna til minstemann og så ei rund madrass til å ha på golvet. Den har til og med vore brukt som overnattingsplass til ein liten gjest ein gang. Eg har brukt overlockmaskina og sømmen som heiter flatlock. Rundt kanten har eg satt på ei list på ca 15 cm med mørk blå bomull, og avslutta med løpegang for strikk som på eit stretchlaken.

Løva som sit på madrassa er kjøpt på ebay. Eg berre måtte kjøpe den når eg såg at den var identisk med den “ihelkoste” løva til 5½åringen – berre sjekk bildet! Det vart full suksess. Ho har nesten ikkje lagt den frå seg sidan ho pakka den opp – den var til og med i barnehagen i dag.

I have finished two projects the last days. The knittingbag/-basket which I started on last year (?) and a cover for a flat matrass for the playcorner of the livingroom (wich started off as a lego-bag). The lion sitting on the matrass is bought at ebay and came all the way from the USA. Our doughter is so happy with her new lion. As you can see the old one (wich she got at her first bithday) is pretty worn out. It isn’ easy to tell that they are identical twins.


Foret til strikkekorga laga eg av restane frå etui-laginga mi. Så no er det full matching. Strikketøyet som ligg oppi er forøvrig rekt oppigjen då eg hadde brukt for tjukke pinnar til tross for at eg strikkar veldig fast. Vel vel – eg bør vel berre vere fornøgd med å få nyte garnet fleire ganger. Veska ser veldig høg ut, men hovedrommet er berre 30 cm høgt (og veska er 35 cm vid i flat tilstand). Det er nok det “hemmelige” rommet under som gjer at den ser ut som eit tårn. Der har eg dei to minste etuia og litt ekstra garn. Veggane i veska er doble og fungerer som lommer.   

I made the lining for the bag/basket similar to my knittingcases and I think it looks better than with the curtain I used a first. There is a room underneat for the smallest cases and some extra yarn, and four pockets on the outside. The inner walls are double; creating pockets all around. The basket is 35 cm wide (flat) and about 30 cm high in the main room. It’s the extra room underneat wich makes it look very tall.

29 mar

Strikkerapport – Finished!

Sidan eg har vist fram halvferdige prosjekter er det kanskje på sin plass også å vise fram når eg er ferdig. Ei helg med til saman 10 timar reisetid gjorde underverker. Her er mine Blueberry Waffle socks og Regia hanskar.   

Finished! Blueberry Waffle Socks and a pair of glowes in Regia – my first gloves ever and I’m glad they are black so that noone can see the bad knitting.