04 jun

Vrangsydd kjole med knyting på skuldrene

I det siste har eg sydd eit par søte kjolar til minste jenta i huset. Denne typen små kjolar eller toppar kan man enkelt vrangsy, men framgangsmåten blir ulik alt etter om det er glidelås/knapping i ryggen eller om det er opning på skuldrane.

Eg tok nokre bilder undervegs medan eg sydde kjolen med sommarfuglar på så om du vil kan du her sjå korleis eg har gjort det. Poenget her er at det er opne skuldrar. Om den er med knyting som eg har gjort, eller med knappar, spelar ingen rolle for sjølve vrangsaumen.

Til ein kjole med for treng du to av både fram og bakstykke. Eit i det stoffet som skal vere utenpå kjolen og eitt av den som skal vere inni. Her har eg brukt eit bomullsstoff med sommarfuglar på til hovudstoff og bomullslerret til forstoff. Sy høgre sidesaum på det ytterste stoffet og venstre sidesaum på innerstoffet. Begge rette mot rette.

Stryk saumane flate. Eventuell dekorasjon eller lommer syr du på no før du går vidare. Eg har brukt desginet i hovudstoffet som utgangspunkt for vinyltrykk på det rosa stoffet.

Legg stykkene rette mot rette og sy heile øverste linja frå ermehull til ermehull og heile kanten nede på kjolen. No står berre sidesaumane att opne. Eg sydde fast knytesnorer på toppen av alle fire skuldertuppane når eg sydde denne saumen.

Vreng kjolen inni seg sjølv slik at sidesaumane treffer kvarandre rette mot rette og sy saumen rundt bortsett frå ein god opning til å vrenge gjennom. Sidan dette er uelastisk stoff kan det vere godt med så mykje som 8-10 cm til dette.

Klipp inn hakk i alle bogar og vreng kjolen med rett sida ut. Stryk den og sy igjen vrengeopninga fint for hand.

 

31 mai

Forklekjole – ny versjon av eit gamalt mønster

I dag har eg lagt ut eit nytt mønster i nettbutikken min. Forklekjole i to størrelsar som dekkar 9 mnd til 3 år.

Forklekjole to-i-ein

Når eg først begynte å sy denne typen kjolar var det etter eit mønster frå alt om handarbeide frå ca 1980. Så gav eg vekk bladet som mønsteret var i – litt sånn i vanvare muligens. Eg har likevel fortsatt med å sy likande kjolar men måtte då pønske ut mitt eige mønster. Eg har no tegna oppatt mønsteret eg har hatt liggande gratis i nettbutikken og selger det no i størrelsane 74/80 og 92/98.

Forklekjole er eit praktisk og fint plagg som ein kan pynte så mykje eller lite man vil. Ein kort kjole som ikkje er i vegen når barn skal opp og ned av det dei skal opp og ned av. Eit plagg som held dei verste flekkane borte frå magen på den fine gensaren utan å vere ei smekke. Plagget har eg lest tradisjonelt har vore brukt både til jenter og gutar, ja kvifor ikkje i grunn.

Mønsteret mitt selger eg i nettbutikken min her. Når du kjøper mønsteret kjøper du òg ein lisens for ein person til å sy for sal av mønsteret (unnateke fabrikkproduksjon). Dersom du har spørsmål eller kommentarar til dette så ta kontakt.

20 apr

Travle tider

Her i heimen er det konfirmasjon i starten av mai og ein del som ein tenker skulle vore gjort før den tid. Blogging og kosesaum lyt difor stort sett vente til roligare tider. For no syr eg bunad. Bunader. Eg har sydd til snart-toåringen og til konfirmanten og sydd om ein bunad til femåringen. Trettenåringen brukar den vi har arva frå mormor og eg brukar min eigen som eg sjølv fekk som konfirmant.
2015-04-20 10.53.25Her heng dei – nesten ferdige. Manglar berre litt montering av maljer og belter.

23 mar

Kjentfolk i bladet!

Eg har vore så heldig å få vere bloggprofil i aprilnummeret av Alt om Håndarbeide – symagasinet. Har du lyst til å vere med i trekninga om å få tilsendt eit eksemplar av dette bladet?

IMG_20150323_103146

Kommenter her i bloggen på dette innlegget, på Instagram eller på Facebook så trekker eg ut ein vinnar fredag på morgonen.

Fredag:  Eg trekte ut ein kommentar på Facebook. Vinnaren er tagga der :)

24 jan

Sykveld

I går kveld (og natt vart det nesten) hadde vi sykveld i barnehagen/grendahuset vårt. Vi var ikkje så mange denne fyrste gangen, men det er veldig mange som har sagt at dei har lyst til å vere med «neste gang» så det gler eg meg alt til. Må berre få bestemt ein dato og sjekka om lokalet er ledig og så syr me på nytt. 2015-01-23 19.08.45

20 jan

Litt om ord i former, men mest bunadsbroderi

Den fyrste instruksjonsvideoen eg laga for Silhouette Studio handla om det å forme tekst i sirkelform. No skal eg kjapt vise deg noko som eg ikkje visste når eg laga videoen. At du kan forme teksten din rundt kva som helst form! På engelsk heiter dette Text to Path. Dette er artig om du vil legge tekst rundt eit motiv eller om du vil ha frittståande tekst i t.d. hjarteform.  Prøv sjølv! Støtt deg gjerne på videoen eg laga om tekst til sirkel og bytt ut sirkelen med den forma du sjølv ynskjer.

Screenshot 2015-01-20 16.23.41

Elles er det for tida mest brodering på bunad som får handarbeidstida mi. Å ta bilde av framgangen er ikkje så lett på ei tre meter lang remse, så de får berre tru meg på ordet når eg seier at eg nærmar meg slutten på broderinga av fjella og bølgene som skal bli pynten på kanten nede på sognabunaden. 9. Mai er siste frist for ferdigstilling og eg har ein tanke om å unngå lange hektiske sykveldar i april. Om det lar seg gjennomføre står att å sjå. Heia meg!
bunadskant

 

05 jan

Eit nytt mønster i nettbutikken i dag òg

Mønsteret eg har lagt ut i nettbutikken i dag er eit PDF-mønster på dokke-, baby- eller barnehue med knyting, berekna på elastiske stoff. Eg har sydd og pønska på dette mønsteret av og på i over tre år og hatt testsyarar på den i to ulike omgangar – tusen takk til dykk! No vel eg å legge mønsteret ut for sal slik det er pr. i dag.

Med i denne fila får du mønster til størrelsar frå 23 til 55 cm (annakvar på oddetal) og ei grundig steg for steg skildring med bilder.

knytehue
(Stoffet i denne hua er «Lillestoff» kjøpt hjå Kjekk og Søt)

Takk for at du respekterer kopiretten! Du kan bruke dette mønsteret til å produsere for sal i liten skala, men ikkje kopiere og dele vidare eller selge mønsteret i seg sjølv. Eg set òg pris på om du opplyser kva mønster som er brukt dersom du velger å produsere for sal.

Du finn mønsteret her.

04 jan

Ei hua for adle hove

Overskrifta er på sognamaol og treng gjerne ei lita oversetjing, eller kanskje ikkje. Uansett kjem det her eit mønster og framgangsmåte på ei hua som skal kunne passe dei fleste.

klossi
Du laste ned mønsteret som PDF gratis i nettbutikken.

Framgangsmåten er ikkje så ulik den som følger med mønsteret som òg ligg til nedlasting gratis i nettbutikken min, men denne hua er litt anleis og litt enklare å lage.  Det finst mange liknande mønster på nett, og dette er mitt – slik eg tykkjer huene vert finast. Sjå berre kor rund og fin den blir i toppen.
toppen

Du må gjerne bruke mønsteret både til å sy til deg sjølv og til andre og for sal om du vil. Eg blir glad om du opplyser kva mønster du brukar, men stiller ikkje noko krav om dette. Om andre vil ha mønsteret er det fint om du viser dei hit for å hente sin eigen kopi i staden for å dele fila direkte. Du kan ikkje reprodusere mønsteret i seg sjølv for sal.

Mønsteret inneheld saumrom på ca 3/4 cm tilpassa overlock, og er i ein størrelse som (litt avhengig av strekken i stoffet) passar frå ca 3-5 år og oppover. Om du finn at du treng mindre eller større omkrets eller høgde står du sjølvsagt fritt til å endre på dette sjølv.

hue m brett

I tillegg til mønsteret har eg laga ein illustrasjon til hjelp når du skal sy. Den viser stoffet slik det er når du har klipt det ut. Studer denne før du syr. Illustrasjonen ligg i mønsterfila.

hueillustrasjon

Du treng 45 x 45 cm jersey eller anna elastisk stoff. Hua skal syast med elastisk saum på symaskin (t.d. skrå sikksakk) eller med overlockmaskin. Eg brukar firetrådars overlocksaum når eg syr huer.

1.Skriv ut mønsterdelane, og lim dei saman eller tegn opp på eit A3ark. Fire mønsterdeler er halve mønsteret mot brett (tilsvarar halve illustrasjonen over).

klipp ut

2. Hua har altså ein mønsterdel som du klipper ut mot brett, av jersey eller anna materiale med god elastisitet. Marker på vrangsida av stoffet hakka som skal klippast ut i begge endar når du teiknar av.  Vent med å klippe desse ut til etter du har sydd rundt heile hua (frå A til B).
Dersom du har eit stoff med mønster med retning er det lurt å markere kva del av hua som skal vere ytterstoff slik at mønsteret kjem rett veg på denne.

Tips: Dersom du ynskjer ei hue med  to ulike stoff på utsida og innsida kan du dele mønsteret på midten – langs den prikka linja på illustrasjonen. Hugs å legge til saummonn. Du klipper då stoff til utsida av delen med A midt framme og til innsida av delen med B midt framme. Sy saman begge delene før du held fram som om du skulle sydd hua i berre eitt stoff.

3. Legg stoffet dobbelt langs brettelinja midt framme, rette mot rette, og sy rundt hua frå A til B. Skrå saumen inn i starten og skrå ut igjen på enden. Dette gir minst mogeleg bulkar på ferdig hue.

 

4. Klipp ut hakka i kvar ende av hua, både i det som blir innerdelen og i det som blir ytterdelen.
trekant vekk

5.Legg hua flat, men motsatt veg av forrige saum, slik at du kan sy saumane G-CD-J og H-EF-I (bokstavar jfr illustrasjonen). La det stå att to-tre cm å vrenge gjennom før I, i innerdelen. Kor stor opning du treng til vrenging er litt avhengig av kor elastisk stoffet ditt er.

sy enden
vrengeopning

6.Brett lua dobbel medan den framleis er på vranga og sy med sikksakk saman dei to punkta der fire saumar møtes. (CD mot EF) Dette vil hindre hua i å folde seg ut under vask og når den blir handtert.

sy i toppen

7. Vreng hua gjennom vrengeopninga utan å dra for mykje i saumen i opninga. Sy vrengeopninga igjen for hand med stigesting (sjå illustrasjon under).
stigesting
Desse stinga kjem på innsida av lua, men det kan gjerne sjå fint ut for det. Om du føretrekk å sy igjen opninga med maskin, anbefalar eg å sy ei toppstikning heilt i kanten.

8. Vreng hua rett inni seg sjølv og du er ferdig!

hue u brett

 

03 jan

Å skjære i stoff med Silhouette Cameo

Som «sydame» er det kjekt å kunne bruke cameoen til å klippe ut stoff t.d. til applikasjonar. Klart det går an å klippe med saks, men det går ein del raskare med plotteren pluss at eg kan få mange heilt like deler om eg ynskjer det.
medlim
Eg skjærer ut stoff med to ulike metodar. Skilnaden ligg i at eg får eit motiv med eller uten lim på baksida.

Uavhengig av kva metode eg skal bruke stryker eg først stoffet. Eg brukar òg ein klesrulle for å fjerne lo og lause trådar så desse ikkje lagar ujavnheiter i kuttinga.
strykeogfjernelo

Klesrulla er forresten veldig god å ha til å gå over ferdige produkter med òg. Eg brukar denne mykje på syrommet.

Silhouette Studio har innstilling for kutting av stoff i nedtrekksmenyen under «cut». Her velger eg light fabric som tilsvarer tynne bomullsstoff. Instillingane på 3-5-33 passar godt for ein ny kniv er mi erfaring. kutting av stoff

TIPS: Om du studerer bildet over kan du sjå at eg har lagt nokre symbol ved sida av kuttematta på skjermen. Desse er symbol eg har tenkt å kutte i eit anna stoff. I staden for å markere dei med NO CUT i cut-menyen drar eg dei berre av matta, noko som gjer at maskina ikkje lengre tar omsyn til dei. Rask og grei løysing i mange tilfelle.

stoffkniv
Eg har kjøpt ein eigen kniv til stoff. Etter det eg har forstått er kniven heilt lik den svarte og at den einaste skilnaden er fargen i plasten. Skilnaden går rett og slett på det praktiske med å kunne halde knivane frå kvarandre. Å bruke stoffkniven på papir vil sløve den fortare enn om den berre blir brukt til stoff.

Så attende til dei to ulike metodane.

Om eg vil ha eit motiv uten lim stryker eg stoffet fast på eit ark frysepapir. Dette er eit papirark som er voksa på eine sida. Stoffet legg du mot vokssida og så stryker du enten på stoffet eller på papiret. Når eg vil ha eit motiv ferdig til å stryke på stryker eg i staden for på vliesofix eller anna tilsvarande dobbelsidig limprodukt på baksida.

Når Viss du får lim på strykejarnet ditt finst det eigne rensestiftar til å fjerne denne limen med. Men prøv å unngå å stryke på limen!

Eg lar papiret sitte på når eg klebar stoffet på kuttematta i begge tilfeller og kuttinga blir heilt identisk for dei to metodane. Kniven skal ikkje skjære i papiret i nokon av tilfellene. Kjapt og greit stoffmotiv klart for applikasjon.
A

Om du lurer på applikasjon laga eg eit instruksjonsinnlegg om det for ei god tid sidan.

10 nov

Litt sydd

Eg har ein fireåring i huset som har sett filmen Frost/Frozen sikkert «ein million» ganger. Så det var ikkje til å lure på svaret når mammaen i ein lur (eller mindre lur) augneblink spurde om jentungen ynskte seg «Elsakjole». I helga satte eg endeleg av tid til å få pønska ut korleis den skulle vere og fekk sydd den saman.

elsakjole
Eg kikka ein del på denne bloggsida før eg begynte. Eit kjekt og lærerikt prosjekt. No spørs det om minstemor må få ein kjole ho òg. Skal det bli ein miniElsakjole av stoffrestane, eller må ho kanskje få ein Anna-kjole som lillesøstera til Elsa i filmen?
Anna-Costume-Frozen
Godt ho enno ikkje har forstått at mamma fuskar med å sy klede….

Og så litt andre ting eg har sydd i det siste. Buksene under er dongeribukser etter «makalaus»-oppskrifta. Størrelsen heiter 90-100, men blir her heime brukt både av ho som brukar 86 og av ho som nærmar seg 110 i størrelse. Lang brukstid med andre ord!
retrobukse dongeribukser
Sidan det snart er vinter har eg sydd ein del huer og halsar i det siste. Halsen på bildet under er sydd i ullfrotte etter mønsteret eg selger i nettbutikken min. Eg har brukt den mønstervarianten som er bølgete her. Stjerna er reflexvinyl som eg har kutta ut med Silhouette Cameo for så å stryke på halsen. Kjekt å kunne pynte plagg med noko så praktisk som refleks! 2014-11-06 14.36.44

 

17 okt

Sy tøfler?

Kulda set inn og eg vurderer å opne for å sy nokre få (2-3-4?) par med skinntøfler på bestilling. Er det noko som kan vere av interesse? Prisar frå kr 260,- (for minste størrelse i skinn). Tillegg for enkelte dekorasjonar som navnebroderi etc. 

toefler martesko bugs

Om du klikkar på menyvalet tøffelgalleri over her kan du sjå nokre andre av tøflene eg har laga tidlegare. Ta kontakt for informasjon om tilgjengelege fargar og prisar. Første mann til mølla!

18.10.14: Fire bestillingar mottatt, og tusen takk folkens! Stengt for bestilling igjen inntil vidare :)

04 okt

Makalaust langbruk

Eg likar veldig godt klede som kan brukast lenge. Dvs at det blir ribb både på ermer, beinkant og nede på gensarar på mange av plagga eg syr. Og langbruk blir resultatet. Eg skreiv i denne bloggposten for nesten eitt år sidan om buksa sydd i str. 70/80 som eg trudde vart knapp til ein eittåring. Den gangen brukt på ei på ca fem månader. Men nei, det vart den ikkje! No er jenta 16 månader og ho brukar den framleis. Det må ein kunne kalle ekte langbruk!
2013-10-01-16.16.58 2014-10-04 11.19.05
Mønsteret på denne buksa kan du finne i boka Handmade. Forløparen til buksa ligg som gratismønster til å laste ned i mønsterbutikken min (ein størrelse).

Eg syr desse buksene for salg og tar kr 200 for vanlige bomullsbukser i denne størrelsen og så oppover til rundt 390,- for ullbukser i størrelse 90/100.  Ta gjerne kontakt om du har ynskje om at eg skal sy ei bukse til deg. Eg har ein heil del ulike både kvalitetar og fargar av stoff.

29 sep

Gjenbruk av dongeri, frå bukse til hatt(ar)

Eg har vore så heldig å få nokre dongeribukser både her og derifrå. Sist frå svigerinna mi på andre sida av fjellet. Ikkje det at det er så kort tid sidan akkurat, men av og til må ting modnast litt før planar blir sette ut i livet. Dei som følger meg på Instagram (ohelenesyr) har sett desse hattane før. Hattar er ein ny erfaring for meg. Dei rundt meg her heime gir tommelen ned for stilen og meinar dette er mote for forrige århundre, om nokon gang, så då er det greitt å kunne vise fram og hente tilbakemeldingar gjennom blogg og facebook. Sjølv syns eg dei både er kjekke å sy og litt stilige å sjå på.

gjenbruk av dongeri

Her har det gått med store delar av buksebeina på ei bukse til dei to første hattane, og litt frå ulike bukser til den siste. Alle er i vaksen størrelse (frå ca 56/57 og oppover), så om det er nokon som er einige med meg i at dei er stilige og har lyst til å kjøpe dei må de berre ta kontakt!

Tøflene under har eg òg laga sidan sist blogginnlegg. Eitt i pelsskinn (sau) og eitt i rosa møbelhud men med såle av samme pels (men i raud). Det siste paret vart til berre fordi eg hadde denne bil-applikasjonen liggande frå ein eller annan gang tidlegare. Dei brune har blitt gitt bort og passa forhåpentlegvis den vetle sogningen som fekk dei.
2014-09-15 14.01.39

14 sep

Symaskinnåler

Symaskinnåler er ofte eit tilbakevendande tema i spørsmål og diskusjonar på syforum og i sygrupper på Facebook. Dette er slett ikkje rart, for ei symaskinnål er ikkje ei symaskinnål og ferdig med det. Feil nål kan både skade maskina (!) og eit elles godt prosjekt kan bli øydelagt eller mindre bra. Mange merkar dette først når dei syr i strikka stoffer som jersey og oppdagar hol rundt saumen, noko som kan skje dersom ein ikkje brukar nåler som «dyttar» trådane til side i staden for å skjære dei over. Skinnåler som er berekna til lær og tjukt skinn brukt i for tunt skinn kan gjere at heile saumen raknar. Men både hoppesting og andre rare saumar kan skuldast at nåla er begynt å bli sløv eller har fått ein skade.

Sewing-machine-needles-types-150x150 tnc5-w250-150x150 114-machine-needle-05-150x150

Nålene finst i mange tjukkelsar og med mange ulike spissar og til og med med ulik lengd og med med to, eller til og med tre nåler i ei, såkalla tvilling- og trillingnåler. Tvillingnålene kjem igjen i ulik breidde mellom nålene og i ulike typar for ulikt stoff. Det finst nåler med fjør på til frihandsquilting og det finst nåler som trer seg sjølv. Sa du at du skulle ha ei symaskinnål?

Det enklaste, eller i alle fall nokså sjølvsagde ved val av symaskinnål er å finne kva nålesystem du skal ha. Dette blir nemleg i hovudsak bestemt ut frå maskindu har. Og då snakkar eg ikkje mest merkenavnet, men om du har ei vanleg heimesymaskin, ei overlockmaskin, ei tvillingsaumsmaskin (coverstitch) eller broderimaskin.

Til vanlege symaskiner skal du ha eit system som heiter 130/705 H eller HAx1 som er ulike navn på same nålesystem. Nokre nålpakkar står det begge deler på, nokre berre ein av betegnelsane. Nokre overlockmaskiner skal ha ein annan nålesystem, den som heiter ELx705, men mange overlockmaskiner og tvillingsaumsmaskiner kan òg bruke 130/705. Mi tvillingsaumsmaskin Brother 2340CV har berre 130/705H (HAx1) 90/14 nåler anbefalt i manualen. Compulock maskina mi, som er ei kombinet overlock og coverstitch, kan òg bruke same nåler som vanlige symaskiner. Hugs at det finst ulike merker av overlock og coverstitchmaskiner, og kanskje er berre eitt av nålesystema anbefalt for di maskin! Manualen er alltid ein grei plass å starte.

universal-150x150leather-150x150 naaler-150x150

Uansett nålesystem må du i tillegg velge type nål. Dette gjer du ut frå kva du skal sy i. Typen har ofte same navn som stoffet du skal sy i, eller seier noko om saumen eller eigenskapane til den spesielle nåla. Ulike eksempel på vanlige typar nåler er «ballpoint», «universal» eller «standard», «stretch», «jersey», «denim/jeans», «leather», «sharp/microtex», eller «tvillingnål». I dei ulike pakkane med nåler er det ulikt tjukke nåler. Tjukkelsen på nålene står oftast oppgitt med både amerikansk og europeisk mål. Typisk 70/10, 80/12 eller 90/14 for standard nåler. Jeansnåler har ofte tjukkelsar opp til 100/16. Som regel vil du trenge ei tjukkare nål til tjukt stoff enn til tunnare stoff. Tjukkelsen på tråden må òg takast omsyn til. Dersom du syr med tjukk tråd må du sikre at det er god passasje i nålauga til tråden. Såkalla topstitchnåler vil typisk vere både grove og med stort nålauga, og metallic/metafil nåler er tilpassa metalltråd.

Tvillingnålene har nummer som seier noko om avstanden mellom nålene og tjukkelsen på kvar av nålene i europeisk mål. T.d. 4,0/100. Som du forstår kan du snevre inn valget av nål nokså bra berre med å sjå på navnet, og med litt øving veit du sånn ca kva tjukkelse du er ute etter til det enkelte prosjektet. Frå vanskeleg og forvirrande og tilbake til nokså greitt i grunn.

No har du altså litt styr på kva nål du skal velge til prosjektet ditt, Men kva nål står det eigentleg i maskina? Kva sydde eg sist? Eller kva type nål er det som står der i nåleputa der? Merking med neglelakk i fargekodar har eg høyrt er ein lur måte å halde nålene frå kvarandre på; i grunn burde dei kome ferdig fargekoda frå fabrikken! Eg for min del prøver å ta ut nåla frå maskina etter ferdig saum, og sette den inn med flat side fram i orginalpakken om eg berre har sydd litt med den. På den måten ser eg kva type nål det er og at den har vore brukt før. Å la ein liten stoffbit ligge att under pressarfoten kan òg gi deg eit hint til neste gang du skal sy om kva du hadde fore ved sist økt.

Kor ofte skal ein så skifte nål? Når er den utslitt? Eg har lest åtte til ti timar saum anbefalt, men eg skiftar nok nåler mykje oftare enn som så sjølv. Eg har lest tips om å stikke nåla nokre ganger gjennom ei brukt nylonstrømpebukse. Ei «flisete» nål vil trekke med seg trådar. Det hender eg sjekkar med ei nagl ned langs spissen for sjå om den har blitt skada om eg merkar maskina fuskar i saumen, eller trillar den langs bordet for å sjå om den er bøygd, men eg må innrømme at er eg i tvil så byter eg alltid nål. Og eg unnar meg som oftast ei ny nål til nye prosjekter. Eg tenker at nåla i alle fall må vere god om syinga skal gå greitt og fint.

 

14 aug

Korleis lage eigne merkelappar (gjensyn)

Eg har òg tidlegare skrive ein post om korleis eg lagar eigne merkelappar til klede og ting eg syr. Eg har òg kjøpt min del av merkelappar, men det er kjekt å kunne lage sine heilt eigne i akkurat den fargen du treng og i den mengda du treng. Så her kjem eit gjensyn med same tema.

Her har eg brukt min nokså nye Silhouette Cameo i prosessen, men det er akkurat same framgangsmåte uansett korleis du velger å sette bokstavane på tøyet.

Merk eit tøystykke med det du vil ha som logo. Du kan t.d. brodere, bruke tekstiltusj, t-skjorteoverføringsark eller som eg har gjort her, vinyl kutta til i plotteren.
label1

Skjær eller klipp til tøystykket ein cm større i alle kantar enn sjølve merket.
label2

Brett stykket midt på, som er midt i logoen i mitt tilfelle sidan eg vil ha merke på begge sider.  Sy dei to kortsidene og klipp av hjørnet inn mot bretten utan å klippe i saumen.
label3

Vreng og press med strykejarn. Hugs å beskytte lappen med strykeark om det er vinyl du stryker på.
label

Resultatet er ein fin dobbelsidig merkelapp som du kan sy på produktet ditt.DSC_5001

 

bug&bird har ein fin tutorial på korleis du kan lage eigne merkelappar med silkeband!

11 aug

Runde lommer med rund opning

rundelommer Lommene på kjolen i forrige post var utprøving av rund opning på lommer men no tar eg det eit steg vidare og lagar heile lomma trillande rund. Har du lyst til å sy liknande lommer så kjem forklaringa på saum av slike lommer her: 1. Klipp ut fire sirklar. Gjerne i to ulike stoffer. Innerstoffet vil syne lite, så mønster er litt bortkasta. Klipp ut sirkelen som skal vere opninga i lomma,  men obs ikkje for nær næraste ytterkant. Dette har med å gjere at for liten avstand vil gjere det vanskeleg å vrenge og du må la det stå igjen meir å sy frå retta til slutt = værre å få fint. På mine lommer her som er 15 cm i diameter var3,5 cm frå kanten omtrent minimum. Opninga blir ca 1 cm større i diameter etter alt er sydd saman, så ta omsyn til det når du velger kor stor opning du vil ha. rundelommer2 2. Sy stoffstykka saman to og to rette mot rette rundt opninga i midten. Klipp hakk i saumrommet – evt med taggesaks slik som eg har gjort det her. rundelommer3 3. Vreng den eine sirkelen inn gjennom opninga slik at stoffa blir vrange mot vrange. Press med strykejarn. rundelommer4 4. Marker med to knappenåler eit valgt punkt ytterst på kanten på begge stoffsirklar. Eg trur at ein plass i nærleiken av den smalaste kanten er ein god plass å starte, men prøv deg fram. rundelommer5 5. Brett dei to sidene som er markert med nåler tilbake over resten av tøysirkelen slik at resten av stoffet havnar i midten. Sjå nøye på korleis nålene står i stoffet på dei to bildene over sidan desse stoffa er like på retta og vranga. På dette bildet er tøysirkelen snudd 180 grader i forhold til på forrige bilde. rundelommer6 6. Pass på at nålene møtes og at du held stoffet i midten godt unna – no skal me sy igjen. rundelommer7 7. Start saumen eit stykke før nålene og sy langs kanten så langt du kan utan å treffe stoffet som er rulla inn i midten. Dra så fram stoff frå midten og hald fram med saumen til det er att omtrent tre cm vrengeopning. De som har sydd panneband kjenner igjen noko her muligens ;) Du må gjerne lirke litt om du har valgt å legge opninga i midten for tett opptil kanten. (Om det er uråd å dra fram stoff må du stoppe og evt sy stor vrengeopning frå retta.) rundelommer8rundelommer9 8. På dette tidspunktet liknar det ikkje noko anna enn Lille Larva Aldrimett ein tidleg sundagsmorgon, men ikkje fortvil! Vreng lomma ut gjennom opninga som står att og press det fint og glatt med strykejarn. Vrengeopninga kan vere utfordrande å få bretta fin og rund. Eg har av og til brukt ein pappmal av eit utsnitt av sirkelen (med diameter ferdig sammensydd) og lagt denne inni vrengeopninga og pressa tøyet rundt denne. Pappen tar eg ut før eg syr. rundelommer0 9. Her er ferdig pressa lomme klar til å bli sydd på, i dette tilfellet, ein forklekjole. Mitt siste tips er å sy begge lommer parallellt slik at du blir ferdig med begge samtidig. Om du vil ha andre former på lommene er frangangsmåten den same. Pass berre på at du har ein breid nok «kanal» til vrenging rundt langs heile lommekanten.

11 aug

Forklekjole med lomme, eller omvendt

Denne forklekjolen vart til i dag fordi eg måtte teste ut lommer med rund opning. Eg er sikker på at eg har sett slike lommer på nett, men siste dagars googling kunne ikkje gi meg noko bilde eller instruksjon. Difor altså utprøving. Lomma vart kul syns eg sjølv. Kjolen er full i feilskjær (smalt tidsrom til saum) men grei nok til heimebruk.

PhotoGrid_1407757313716

04 mai

Kan det bli festdrakt – igjen?

7. mai 2011 sydde eg på festdrakt til ho som då var minst. Den drakta har eg ikkje lengre, og kjolen eg syns var grei til minstemor her heilt fram til i dag syns eg no er grei nok som reserve. Det aller kjekkaste hadde jo vore å sy ei ny festdrakt til henne. Kvit ull er funne fram til overdelen. Skjørtedelen er klipt til og no skal eg berre få landa på kva broderi eg skal lage på ryggen av drakta. Noko rosemalingslignande kanskje?

Screenshot lite

13 okt

Baby i hus og tid til alt anna enn blogging

Tida fyk med baby i hus (og dei krev litt tid dei fire andre òg). Eg tenker innimellom at eg skulle nett ha blogga ditt og datt, men så er tanken borte like fort som den kom. Eg har imidlertid laga både det eine og det andre sidan sist blogginnlegg.

Eg har sydd ein del av ulla eg kjøpte på Janusfabrikken. Ei jakke i Krinkelull – med ulljersey i hetta. Eit favorittplagg allerede. Eg lurer imidlertid på å ta litt av på ermene for at den skal vere meir passelig no.

2013-08-09 19.38.51

Av ulljersey har eg sydd mellom anna tre bodyar, tre bukser og ein heildress i litt ulike fargekombinasjonar. Bodymønsteret er laga med deler frå ulike mønster og buksa eg har sydd er ein enkel tights frå Ottobre.

2013-09-21 14.09.22 2013-09-22 10.36.012013-09-22 10.38.11

Buksa som eg bidrog med i boka «Handmade» er komen heim etter å ha delteke på lansering av boka og er teken i bruk her. Eg trudde denne var sydd i str. 70/80, men i og med at den ikkje er i elastisk materiale passar den godt til minstemor på rundt 65 cm, og eg trur den blir nokså stram før ho blir eitt år (80). Dvs at det sikkert er lurt å gå opp i størrelse om ein syr i stumt materiale.

2013-10-01 16.16.58

Vetlesysta som går i barnehagen trengde sårt nye tøfler, og denne gangen tegna eg rundt foten hennar som utgangspunkt for sålen. Blir vel fotformsko det ;) Ho ville helst hatt rosa tøfler, men sidan det ikkje var rosa pelsskinn i haugen min godtok ho brunt med kvit pels. Eg har òg skore til skinn til tøfler til minstemor, men eg ventar på å få tak i strikk til dei før eg syr dei sammen. Ho skal få modell med høgt skaft i burgunder pelsskinn. Planlegg å prøve ein liten ny vri på denne sidan den høge modellen enno ikkje er heilt slik eg vil ha den. Skinnet er som alltid Islandspels frå Skinnlåven på Hønefoss.

2013-10-07 20.12.44

Non-stop-top har eg strikka fleire av tidlegare. Eit greitt mønster som ikkje gir alt for mykje hovudbry. Denne gangen strikka eg i Kauni (EQ/Regnbogefarga) og pinne nr. 3. Eg hadde tenkt sist eg strikka denne at eg skulle lage halsen rundare framme, men gløymde det igjen. Neste gang… Det eg imidlertid gjorde var å strikke inn tre kortrader over nesten heile bakstykket nederst i ryggen slik at den er sidare bak. Eg strikka òg inn ei hullrad nede. Den har dobbel funksjon. Pynt og knapphull. Knapphull til å feste bodystykket som eg òg laga til ekstra utenom mønsteret. Minstemor er ikkje så lang i ryggen enno at bodystykket hadde så mykje for seg, men eg syns det var grueleg lurt påkome ;)

2013-10-12 11.34.13

Ho lyt få fleire slike vestar/kjolar og sidan eg har som mål å få til ein bedre hals på denne bør eg gjerne berre legge opp på nytt mens eg fortsatt hugsar kva eg hadde tenkt :P

06 aug

Lærekøyring – eller Blogging a la Instagram

Trening må til når ein skal sy med ny(e) maskiner. Eg har fått øvd litt etter at eg fekk covermaskina i hus, men køyrer fortsatt litt i grøftene i svingane for å halde meg til lærekøyringsmetaforen. Men plagga er gode og i bruk til tross for litt feilskjær og passar fint til minstemor. Ikkje minst er det kjekt å kle henne i heimelaga tøy.

 IMG_20130728_193119  IMG_20130724_100620

 

IMG_20130806_191523 IMG_20130803_181310

Her er det ulldress sydd frå ein litt krympa ulltunika frå Nøstebarn, bomullsheildress i ny bomull og ullbody og dress  i ny ulljersey frå Janusfabrikken.

 IMG_20130805_094740 IMG_20130805_164349 

Måndag var eg sjølv på Janusfabrikken og handla meir ull. Utvalet var eit heilt anna enn i nettbutikken, og eg kom heim med mange ulike fargar og kvalitetar, med meir eller mindre planar bak. På vegen heim var eg òg innom Voss og Tiljamiid. Sjølv om dei ikkje selger mønstra jersey lengre, handla eg ørlitt der òg. Dei to øverste stoffene er derfrå. Bambusvelour og -jersey.

21 jul

Maskinene mine

Her i starten av månaden fekk eg plutselig kasta litt sylyst over meg og satte meg ned med maskinparken min. Ja, for når ein har fem maskiner kan det vel kallast ein maskinpark. Ein liten presentasjon kan vere på sin plass. Først dei fire første i rekkefølga dei kom i hus.
Husqvarna Daisy kjøpte eg som første maskin i 2001 eller deromkring. Før det sydde eg på lånte maskiner. Nummer to er Janome 6600 pro. Ein arbeidshest og feinschmecker på ein gang. Den kan mykje, er sterk og syr godt. Trearen er broderimaskina Janome 350E. Denne brukar eg til broderi på alt frå skinntøfler til dåpskjolar. Ja, det blir visst stort sett med det. Den fjerde, Janome Compulock, er ei kombinert overlock og coverstitchmaskin. Siste funksjonen har eg aldri fått heilt til dessverre, så den er i bruk som rein overlockmaskin. Og overlocksaumar syr den sikkert og flott.

Viking_Daisy6600pro

janome_350ejanome_compulock_888

Det femte og siste medlemet i parken er dette:

brother cover

Ein Brother coverstitch. Den syr tvilling-, trilling- og kjedesaum og er kan vel kallast ein lillebror både på størrelse og at den har så avgrensa bruksområde. Men her blir igjen linja frå sangen om lillebror sann for det denne kan er det lillebror som kan best!

Etter berre litt testing av maskina kjenner eg at det skal bli moro å bruke denne framover!

pysjogbody

08 jun

Makalaus Krinkleull, eller «Janus møter Nøstebarn»

Denne veka har eg sydd og lappa litt ulltøy innimellom amming og bleiestell. Ja, for tenk at vi no blitt sju i familien vår! Den minste vetle jenta vår er perfekt på alle måtar, og alle i familien er så glade for å at ho endeleg er komen. Her på bildet er ho seks dagar gamal.

babyen

I dag har eg sydd ei ullbukse etter eige mønster (Makalaus bukse) i Krinkleull frå Janus. Det er kjekt at ein endeleg kan kjøpe ullstoff frå Janusfabrikken.
makalausbukse bakfra

Før fødselen fekk eg òg kjøpt ein heil Norgespakke med veldig godt brukt ulltøy. Dette har eg vaska og farga og lappa ein del av allerede. Nøstebarndressen (mørkeblå i midten under) fekk nye ribber på bein og ermer og den eine foten fekk nytt liv som lapp på kneet. Gensaren med stripete ribb fremst var ein kvit body før omsaum og farging. 
fiksetoy1

Eg har framleis igjen fleire plagg å reparere småhull på. Kjekt når ting kan gjenbrukast :)
fiksetoy2

12 mai

Småttisklede

Småen i magen begynnar å nærme seg dato for lansering. Noko eksakt dato har han eller ho ikkje klart å gje meg, men så langt ut i juni blir det i alle fall ikkje. I dag har eg vaska opp litt klede for å ha slik i starten og vi hadde klar overvekt av bodyar. Altså passa det perfekt å sy nokre bukser.

Den kvite buksa er sydd av bambusjersey. Ribbekantane er òg ein bambusjersey med litt spandex. Ei tunn og lett bukse som blir fin når sommaren kjem. Ooga booga-buksa er bomull med bomullsribb, og den blå er velour + gul bomullsribb. Dei to lysaste buksene har òg fått seg ei matchande hue. Mønsteret til buksene er det same som eg har bidrege med i boka «Handmade».

makalaus

Siste kveldane har eg strikka, og rekt opp og strikka litt meir på ei lita bleiebukse i ull. Men no er den ferdig. Oppskrifta er litt Curly Purly og litt berre fri fantasi. Beina vart så lange som eg hadde garn til.

Har visst heller ikkje vist fram dei to bodyane eg har strikka etter Fragaria si oppskrift «Benjamins voksebody«(str. 0-5 mnd). Dei ser, som det meste som er ribbestrikka, kjempelange ut uten unge inni. Den brune er i Islandsk Kambgarn og den kvite i Merinoull frå Nille/Gjestal. Den brune er meir kompakt enn den andre, så eg er litt spent på korleis den er i bruk. Den kvite er i det same garnet som eg strikka lue i tidlegare.

strikkesmaatt

 

No er pinnane tomme her, men garnkassen er ikkje tom så eg skal nok klare å finne på noko som kan vere kjekt å ha til ein liten kropp. Nokre fleire sokkar kanskje. Eller ein vest? Eller nokre små vottar til småkjølige kveldar. Skinntøfler skulle eg jo òg ha sydd, ikkje sant?

 

10 apr

Har du lyst på den nye syboka «Handmade» heilt gratis?

handmade by meEg har tidlegare fortalt at eg har vore så heldig å få vere med i ei ny sybok som kjem ut no i april. No nærmar boka seg med stormskritt, og eg har fått lov til å lodde ut eit eksemplar i bloggen min. Boka er hovudbok i Hobbyklubben  no i april!

Om du vil vere med i trekninga av boka så legg igjen ein kommentar her. Gjerne ein som får meg til å smile ;) Eg har ingen andre krav enn dette.

Trekninga blir gjort den 14. april etter kl 20.00.

 

Her heime går det elles i strikking og litt småreperasjonar på symaskina for tida.

 

kragejakke smart

Kragejakka av Sandnes Smart, men etter oppskrift frå «Strikk til Nøstebarn» nærmar seg ferdig. Eg skulle opprinneleg strikke den av restegarn, men endte opp med å måtte kjøpe tre nøster (dvs. nesten halvparten av det eg trengte). Så no håpar eg jakka fell i smak. Har berre igjen å strikke knappestolpane.

2013-03-29 22.27.31

Eg har òg strikka nokre små søte brune raggsokkar til baby i tunn Abuelita merino multi. Mønsteret eg har brukt til desse er henta frå «Myk Start» og heiter raggsokk til mini og mamma.

2013-04-10 10.43.45

Før eg strikka raggsokkane laga eg eit par «Stay-on Baby Booties» i kvitt. Dei vart litt store med tanke på ein heilt nyfødd, men sikkert gode til vinteren igjen.

 

22 mar

Småplukk til eit lite knøtt

Vi (les: eg) begynnar så smått å kome i reirbyggingsmodus. Det er vel ikkje så rart i og med at våren er rett rundt hjørna ;)

Av plagga her var det første eg laga ribbebuksa i Kauni (EQ og EC). Eg prøvde meg på første gang på å strikke med Magic Loop og første møte med dette garnet. Garnet er greitt nok det, men eg vart skuffa over at det var såpass mange knutar/skøyter på garnet og at eg difor måtte nøste vekk ein del garn på andre beinet t.d. Men stilig vart det jo. Og eg har igjen nok garn til nok eit lite prosjekt eller to. Garnet er ikkje så mjukt at eg vil ha det direkte mot hud – i alle fall ikkje på baby, men til ytter- eller mellomplagg passar det fint.

Ikauniribbebukse

Etter buksa var ferdig la eg opp til eit babyteppe i babyull frå Sparkjøp. Eg strikkar desse alltid av seks nøster/300 gram. Då blir dei store nok til å vere eit teppe som kan brukast i mange år. Alle mine fire ungar har fått minst eitt slikt teppe. Etter teppet strikka eg ei bittelita hue i babyull. Denne tenker eg kan vere fin å ha på baby første timane/dagane uansett årstid.

teppeoghue

I dag har eg sydd ei lita bukse med matchande hue. Størrelse nyfødd 50/60. Eg syns det meste av bukser som er til salgs i butikkane er enten i litt for stivt stoff eller med bein eller… Ein blir gjerne litt kresen av å sy sjølv, men eg har i alle fall planar om å lage fleire slike til babygarderoben. Som ein kan sjå av biletet er det full vår ute :P

elefantsett

23 feb

Handmade. Norges beste syoppskrifter

handmade by meFor to år sidan kom boka Made by me – Sybloggernes beste oppskrifter, og no er det klart for oppfølgaren! Den må jo berre (heilt objektivt sett sjølvsagt) bli enno bedre. Eg var så heldig å få lov til å vere med denne gangen!

Boka kan forhåndsbestillast i alle landets nettbokhandlar, og vil være i sal i alle bokhandlar fra ca. 15. april. Prisen er kr 389,-. Om du er medlem i hobbybokklubben kjem boka til deg der som hovudbok i april.

Mitt bidrag i boka er ei enkel baby/barnebukse og eg er sjølvsagt kjempespent på responsen på mitt eige mønster. I tillegg kjenner eg godt til fleire av dei andre som bidrar i boka via bloggverdenen/syforum og eg trur er sikker på at dette er ei bok mange vil ha lyst til å eige.

Frå forlaget si eiga omtale av boka:

Et utvalg av Norges beste syoppskrifter!

Bli inspirert av kreativiteten og sygleden til bidragsyterne i denne boken. Oppskriftene er et resultat av en konkurranse som ble spredt via sosiale medier, og de 50 beste bidragene er samlet i Handmade. Her finner du oppskrifter på klær til voksne og barn, tilbehør, interiørprosjekter og utstyr til babyen. Boken passer like godt for deg som er helt ny i faget som for deg som har traktert symaskinen en stund.

Følg gjerne Motor Forlag på Facebook!

15 feb

Karneval og strikketid

Februar er tid for karneval, og sjølv om eg ikkje alltid er like entusiastisk i forhold til krumspring utover kvardagen så prøver eg å stille opp. Når det så er toåringen som skal i veg er krava (heldigvis) ikkje alt for høge. Jentungen ville vere «pus» på karnevalet i barnehagen og det hadde vi ikkje spor av i utkledningskassa vår. Men vi har skinn og vi hadde ein hårbøyle som ikkje var i bruk. Så då sydde eg to doble trekantar som eg tredde inn på hårbøylen.

Kombinert med litt sminke vart ho den søtaste pusen i mils omkrets.

puseoerer

Elles nevnte eg vel nett at eg strikka på Mariusgenser til eldstejenta. No er den ferdig og eg har notert meg eit par-tre ting. Eg burde ha gått ned ein halv pinnetjukkelse til pinne nr. 3 og halsen på størrelse XS vart alt for vid slik eg strikka den. Eg endte med å felle ned til 84 masker, noko eg syns vart passeleg.

Etter at eldsta no har «prøvd» gensaren i eit par døgn har eg endeleg fått den av henne for å få blokka den. Så får vi tru den er tørr igjen til bruk i morgon.

marius med rosa

Ja og så veit eg kva feil eg ikkje skal gjere i mønsterborden om eg skal strikke Marius fleire ganger… Det er ei her som ynskjer seg Mariusjakke i orginalfargane og med glidelås, men eg har ikkje lova noko som helst enno. Blir i tilfelle strikka i Smart.

Eg har òg fått strikka ein liten «sjelevarmer» etter mønster frå Nøstebarn. I størrelse nyfødd. Men så små nyfødde som denne ser ut til å passe til har vi ikkje vanlegvis her i familien. Vi får sjå om den passar, elles er det vel andre (eller ei dokke) som kan ha nytte av den. Søt var den i alle fall. Den er 12 cm breid/høg – men elastisk på grunn av rillestrikken.

sjelevarmer

Tøflene frå førre post har forresten vore i bruk i barnehagen eit par veker alt. No har eg klipt ut pelsskinn til nokre heilt små tøfler, som er så kjekke å ha til barselgaver og liknande.

14 jan

UFO-jakt

Denne veka har eg rydda litt på syrommet mitt (så no ser det berre passelig rotete ut) og samtidig jakta litt på UFO-ar = UFerdige Objekt eller opprinneleg UnFinished Objects.

No har eg fått sydd sålar på nokre strikkatøfler som eg bytta til meg for *mumle* år sidan, sydd nytt innertrekk på ei velbrukt pute, stramma strikken på eit bleieomslag og reparert eit bordtennisnett til gutungen. I tillegg har eg heva eine bordet på syrommet slik at det no er i passe ståhøgde. Har sakna eit skikkelig bord til skjæring/klipping, men så kom eg på at eg jo har stillbare bein på eine bordet mitt og då var det fort gjort å endre høgda på det.

Kva skal eg ta fatt på no då? Vetlesysta skulle hatt nye tøfler i barnehagen og har rikeleg med andre UFO-ar som eg kunne ha prøvd å fått ferdigstilt.

Men det er  jo alltid kjekkast å starte på noko nytt ;)

14 sep

Fora pung

Om ein googlar på «lined zippered pouch tutorial» kan ein finne mengder av framgangsmåtar på korleis ein lagar slike pungar som dette. Bildene på google viser pungar i ulike størrelsar og av ulik utsjånad.

Eg har funne min måte å gjere det på, ein måte som eg syns gir god form på pungen rundt endane på glidelåsen og som lagar ein liten botn slik at pungen kan stå oppreist under rette forhold.

Ytterstoffet her mistenker eg er frå IKEA – korriger meg gjerne. Litt sånn halvstivt med ørlitt struktur. Innerstoffet er vanlig lappestoff – tunn bomull. Glidelåsen er resirkulert frå eit eller anna plagget. Planlegg å bruke litt av lappestoffene mine til å lage fleire slike pungar. Kjekke å ha til dømes i veska, kofferten, strikkekorga, skulesekken eller toalettveska til dei små tinga. Kjapt prosjekt til korte systunder.

26 jul

Gjenbruk av bøker

Huset vårt inneheld ein heil masse bøker. Eg er litt arveleg belasta med bokglede, men innlegget her går ikkje på lesing. Tvert imot på alternativ bruk av bøker. I sommar kom det nemleg ei heil ladning med gamle bøker på trappa frå noko eit bibliotek hadde kassert. Eg likar veldig godt å lese, men her var det meir enn eg kunne gape over. Sjølv om eg sikkert burde formidla bøkene vidare til nokon som kanskje ville lese dei så gjer eg ikkje det. Ikkje alle bøkene i alle fall. Nokre av dei skal eg sprette opp…

Ei av bøkene har eg alt partert og laga om til ei veske etter inspirasjon frå mellom andre Hungrypanda og Wikihow. Eg trur eg vil  teste ut å følge den fyrste av desse meir slavisk  neste gang. Både fordi den er den som inneheld mest saum og fordi den ser ut til å gjere ting på litt lurare måtar på eit par av punkta eg streva med på denne.

Hankane er heimelaga av skinn med ståltråd som forsterkning inni.

21 nov

Testing testing 1,2,3…

…4 og 5.

Testing må til når ein skal få til gode plagg. Og testing har det blitt ein del av siste tida – av huer. Eg har både fått andre til å teste huemønster via forumet sykroken og har sydd ein heil del huer her heime sjølv.

Her er fem av dei minste eg har sydd siste dagane. Frå størrelse 24 som passar til ei lita dokke, str. 32 som passar til baby-born-dokka og opp til str. 47 som passar til vetlesysta her i huset. Størrelsen større er òg omtrent i boks. Planen er å få fram mønster på desse opp til og med ca 53 cm.

Eg tykkjer etter kvart at eg har fått fram ei hue som går godt ned både i panna og nakken, men det står att ein del prøving før eg er framme ved ferdig mønster i alle størrelsar.

Alle babyhuene har ytterstoff av bomullsjersey frå ulike butikkar, og innside i enten ull eller bambus. Dokkehuene har innside i bomullsjersey. Som snorer brukar eg helst flate skosnører. Gode, mjuke og skikkeleg haldbare snorer.

Eg har ikkje bestemt meg for om eg skal legge ut mønsteret for deling/sal. Det fins etter kvart mange mønster å få kjøpt på nett, så det er mogeleg eg berre brukar dette mønsteret for eigen produksjon.

19 nov

Lun hals og varm puls – mønsterslepp

No kan de få kjøpe mønster på den flotte halsen (/kragen/laushalsen) og pulsvarmarane som eg har pusla med i det siste.

«Mønsterbutikken» finn du her eller ved å fylgje linken oppe på menyen. Mønstera er digitale (pdf-filer) og til personleg bruk. Skikkelig raske, fine og varme både til gåver og til eins eigne og god bruk av restebitar etter t.d. kjolesaum.

Ta gjerne kontakt om du har spørsmål knytt til mønstera eller til kjøp av desse.

Takk til gode sydamer på sykroken som har stilt opp og prøvesydd og kommentert på mønsteret for meg!

07 nov

Varm puls

Eg syslar med å lage mønster til pulsvarmar og hals og i dag sydde eg nokre nye av fyrste sorten for å teste ut framgangsmåten. Herlege mjuke i finaste merinoull. Desse er fine både til tastaturbruk og utendørsaktivitetar når det er berre litt kaldt.

Gode nettvenner hjelper meg med å teste ut mønsteret før eg legger det ut for salg. Lurer på å inkludere ei lue i mønsteret, men har ikkje heilt bestemt meg for kva slags lue det i tilfelle skal vere.

06 nov

Litt kladd med fleece og nok ein onion-kjole

I dag har eg sydd dette settet i fleece i dag som ein «kladd» på vegen mot å lage eit godt mønster på hals og pulsvarmarar i valgfritt stretchmateriale. Eg tenker sjølv primært å lage halsen i ull og evt. pulsvarmarane i litt fleire variantar som pyntete i jersey eller litt varmare i ull. Mønsteret har eg tenkt å prøve å digitalisere slik at det skal kunne delast.

Pulsvarmarane vart straks adoptert av eldstejenta på 11, og mellomsta har bestilt seg eit par ho òg. ;) Fargen er lilla på desse og både halsen og pulsvarmarane er vendbare (men like på begge sider).

Kjolen som eg nevnte i forrige post laga eg ferdig i går. Den har fått lommer og broderi. På venstre arm står det «Take what’s left and make it right». Ei lita heks og katten hennar har fått plass på rompa. Broderiet er laga med tråden Güterman Mara som eg har fått til å teste ut frå denne nettbutikken via forumet sykroken.

Eg har laga lomma av eit einaste stykke tøy og viser gjerne korleis eg gjer det om nokon er interessert.

03 nov

Onion 2035

Tunika sydd i isoli med fôr av bomullsjersey i hetta (og som kant nederst). Mønster Onion 2035.

Eg har sydd nokre gensarar/tunikaer og kjolar til meg sjølv, men dei blir stort sett ikkje så mykje brukt. Eg har alltid eit eller anna å utsette på dei. Enten det er passform, ein eller annan feil eg syns eg har gjort, eller halsen. Halsen er nemleg veldig viktig for eit plagg – bortsett frå på bukser muligens ;). Denne tunikaen har fått hette, noko som lagar ein god hals. Og for den saks skuld er eg villig til å sy fleire hetter sjølv om eg ofte syns dei blir litt i vegen. Kanskje ikkje så mykje i vegen på eit vaksenplagg som til barn, men det er eit litt uavklart forhold mellom meg og hetter.

Eg har alt klipt til ein tunika til i samme mønster. Litt smalare i ryggen og lengre overdelar, heilt lange ermer (denne vart verken 3/4 eller lange) og ikkje fullt så spiss hette. Det siste rett og slett fordi det ikkje var stoff til meir. Mulig eg brukar restane av stoffet til lommer. Lilla isoli med fôr av rosa/cerise bomullsjersey. Kanskje eg til og med pyntar den med eit eller anna broderiet.

27 okt

Uhu!

Oktober går mot slutten og Halloween skal feirast med gode venner både her og der. 9åringen bestilte kappe – med ermer og hette. Etter å ha kikka på kapper i leikebutikkane og tenkt litt fram og tilbake har eg i dag sydd ei kappe til henne her heime.

Her kan du sjå korleis eg klipte ut i stoff som er bretta dobbelt to ganger. «Mot brett» er først oppe i skulder-erme-linja og så midt framme. Utklippet mellom ermet og sjølve kappa vart til hette. Gledar meg til å prøve den på henne når ho kjem heim.

Eg skvetter kvar gang eg går forbi den der den står og sniker i kroken ;)

18 okt

Oktoberstille – i bloggen

Når eg ser gjennom bilder på maskina mi og innlegg i bloggen er hausten ofte ei stille tid. Tilsynelatande. Det betyr for min del berre at det skjer mykje i RL i familien. Korps, 4H, musikkskule, allidrett, fotball, turn og klatring er noko av det som ungane er med på i haust. Og vi køyrer. Til og frå. Bringer og hentar.

Handarbeidsfronten avspeglar litt av dette. Ei av jentene har form og fantasi i 4Hoppgåve så då har ein del tid på syrommet blitt brukt til hennar prosjekter. Ho har mellom anna designa og klipt ut lappar til ei dongeriveske. Ho sydde sjølv bitane sammen til sidestykker og så monterte eg veska og sydde på hank. Ho fekk sjølv klippe opp alle kantar på veska før den fekk ein runde i vaskemaskin og tørketrommel. Stilig, ikkje sant?

Vegglommer til det nye rommet hennar har vi òg laga. Her sydde nok eg det meste, men det var ho som bestemte korleis det skulle sjå ut.

Lommene er frå ulike bukser som er kasserte og sjølve framstykket er deler frå to ulike buksebein frå to ulike bukser. Eg har ein heil kasse med dongerirestar så det var godt å få brukt litt av dette til desse to prosjekta. Bakstykket er einsfarga brun bomullslerret. Eg sydde på eit stykke med platevatt for å få det litt stivt.

På sundag er det haustfest og produkta frå årets oppgåve skal stillast ut. Midtimellomjenta har ballett som si oppgåve og stiller mest ut bilder. På festen skal ho danse (ikkje akkurat ballett men…) med ei vennine i heimesydd kostyme. Muligens både bukse og topp dersom mora får satt seg ned og sydd ferdig toppane. Elles får det bli heimesydde bukser og svarte t-skjorter frå Cubus ;)

09 sep

Litt barnehagesaum og actionbilder av gårsdagens bukse

Eg har pusla med litt syarbeider i dag òg. Tøfler til barnehagen må til og dei fekk visst køyrt seg med det samme ute i sandkassa (ut med pappaen ja). Så vått som det var i graset dag vart ho både litt våt og kald på føtene til slutt, men det heldt lenge. Så ingen kan seie at dei ikkje er skikkelig testa i alle fall. Buksa som eg sydde i går gjekk med i same testen. Funkar godt både til traktorkøyring, sandkassegraving og anna moro.

I går sydde eg forresten òg ei jerseylue med ullfôr. Den er berre ein litt større størrelse av lua eg har sydd tidlegare etter eige mønster (eit mønster som eg visstnok hadde tenkt å dele – skriver opp digitalisering av mønsteret på to-do-lista). Vetlesysta meinar forresten at om katten kan drikke av sølepyttar når han er tyst, ja så kan vel ho òg gjere det!?

08 sep

Ei bukse som slett ikkje er kilen

Eg har sydd fleire bukser etter eige mønster til vetlesysta no, og dei har alle vorte litt ulike. Nokre har eg sydd uten kile og nokre med, nokre med lange bein, nokre med korte, nokre med ribb og nokre uten. Så var det det med kile då – veldig greitt å få lagt til litt slitestyrke og bevegelsesrom i skrittet, men plundring å få sydd fint sammen. Så kva gjer ein då? Jo, ein lagar eit mønster uten kile. Eller, buksa har på ein måte kile likevel sidan eg har integrert litt ekstra stoff i bakstykket.

Den lilla ullbuksa under var første test på dette nye mønsteret. Sjølve buksa er i ein tynn ullfilt og kantane oppe og nede i ulljesery.


Etter første utkast tegna eg mønsteret på nytt og sydde ny testbukse. Denne har eg ikkje fått prøvd på jenta enno, men eg syns den ser ut til å vere slik eg vil ha den. Buksa er sydd i velourrestar etter ein kjole/tunika eg sydde til meg sjølv her om dagen. Velour har god strekk, så eg har brukt samme stoff til ribb både oppe og nede som i sjølve buksa. Resultatet er ei romsleg bukse heilt utan irriterande saumar midt framme og bak.

28 aug

Gjenbruk og langbruk

Langbruk er gjerne ikkje eit ordentleg ord, men eg prøvde berre å finne eit ord for å bruke noko lenge. Vetlesysta har begynt i barnehagen og eg har kjøpt ein todelt overtrekksdress til henne til litt å ha når det regntøy eller parkdress blir for tjukt eller for tett. Eg likar ikkje å kjøpe tøyet berre akkurat passe stort, men det er heller ikkje så moro å gå i for store plagg, men med akkurat desse to plagga hadde eg ein plan for korleis eg kunne unngå dette.

Buksa har eg stramma strikken nede på nok til at den held seg oppe over skoa. Jakka måtte eg gå litt meir drastisk til verks med. Her bretta eg dobbelt litt av foret og sydde ein saum rundt heile ermet. Eg brukte ein tråd i sterk farge slik at den skal vere lett å plukke vekk når jenta treng lengre ermer. Her har eg tatt bilde når eg har fiksa eine ermet. Ein kan skimte legget såvidt på bildet.

Haust og skulestart er ofte tid for å rydde litt i klede. Med fire ungar blir det ein del som skal arvast mellom dei ulike ungane, noko som skal lagrast og noko som skal gis bort eller kastast. I haugen med avlagt tøy såg eg meg ut eit velourskjørt som eg har sydd om til ei bukse til vetlesysta. Litt stor enno. Kan tenke meg den er ca str. 86/92. Eg brukte mitt eige mønster.

18 aug

Skinnsaum

Haust = skulestart. Eg hadde lova eldstejenta mi eit nytt pennal i skinn og at det skulle vere ferdig til skulestart. To dagar før er vel i rikeleg god tid vel? Eg broderte navnet hennar på eine sida før eg sydde det saman. Eit firkanta stykke på 20×23 cm (23 er lengda) og sirklar med 7 cm diameter i endane. Glidelås på 25 cm for at den skal sitje godt fast i endane. Denne syr ein på før ein syr på sirklane i endane. Eg la òg inn ein folda skinnbit i kvar ende for å ha noko å halde i når ein skal opne og lukke glidelåsen.

Det var forresten ikkje berre skuleungane som skulle ut av huset her i dag. Minstejenta vår hadde fyrste tilvenningsdag i barnehagen og eg var med heile tida. Under lunsjen såg eg at det mangla stropper på fleire av tripp-trapp-stolane. Det er lenge sidan barnehagen har hatt så mange små som i år (trur eg), og at slike småting forsvinn når dei ikkje er i bruk er ikkje så rart. Eg spurde om dei var interessert i at eg skulle sy nokre nye, for det er veldig kjapt gjort. Det var dei. Så medan vetlesysta sov ut etter barnehagebesøket, og  broderimaskina jobba med å merke mellom anna handdukar og koseklutar som skal vere med i barnehagen, sydde eg tre stk.

Framgangsmåten er som fylgjer: Klipp ei skinnreim 46 cm lang og tre cm breid og klipp endane runde. Brett remsa dobbelt og sy rundt langs kanten frå ca fem cm frå bretten til du kjem like høgt på andre sida. Putt ei (tre)perle ned i remsa, mellom saumane, og sy så tvers over øverst (ca fem cm under bretten). Forståeleg? Om du ser på bildet og i tillegg har brukt ein tripp-trapp-stol så gir det kanskje meining. No kan du sy matchande remser til alle stoputene du har ;)

Vidare planar på syrommet er å lage i alle fall ei smekke etter oppskrift frå boka Growing Up Sew Liberated som eg fekk i posten her om dagen. Ei vendbar smekke som ein kan bruke både bak fram og på begge sider. Må vere perfekt til barnehagen der eg ikkje kjem til å hugse å  kan ta den heim for vask kvar einaste dag. Om eg i tillegg syr to, så burde eg vere godt sikra på den fronten.

26 jun

Eplenikkers

Kanskje ikkje akkurat rett bruk av ordet, men det var det som falt ned i hovudet som nødvendig tittel på dette blogginnlegget.

Buksa er frå eige mønster som sist, og stoffet er mønstra babycord. På denne klipte eg buksedelene 6 cm kortare på beina enn i orginalmønsteret. Oppe i livet laga eg ei linning av to stykker like breie som hhv fram- og bakstykke (bakstykket er ørlitt breiare) x 8 cm. Inne i linninga har eg ein 3 cm brei strikk som eg sydde fast på buksa sammen med linninga. På den måten vrir den seg ikkje i bruk eller vask.

Buksa gir godt bevegelsesrom til tross for at stoffet ikkje er elastisk. Eg vurderte å sy på volang eller blondekant nede, men bestemte meg for at mønsteret i stoffet var meir enn nok pynt i seg sjølv på denne.

Lengda på buksa er heilt perfekt i sommarvarmen. Kort nok til at buksa er luftig. Lang nok til at sola ikkje svir den tynne huda og til å dekke knea når småsteinar og kvistar spenner bein på vetlesysta.

Eg elskar å få kommentarar!

24 jun

Hjertebukse

Buksemønsteret eg har delt tidlegare fungerer fint òg på stumme stoffer. Dvs. eg har brukt jersey som ribb oppe og på beina, men eg skal òg sy ei sommarbukse uten ribb og vise at det går fint òg uten dette, men med linning og strikk oppe. Tenker å prøve å notere ned mål på linninga når eg syr den slik at eg kan skrive dette inn i buksemønsteret.

Buksa er sydd av to fargar babycord og den nevte jerseyen. Eg brukte saumrom på ca 1cm på alle kantar på denne unnateke på kilen og den passar godt til vetlesysta på 15 månader. Ribben i livet er skikkelig breid og her har ho den bretta dobbel. Buksa er lang og god, og uten sko kjem den litt lett under beina sidan eg ikkje laga ribben så veldig stram. Sommarbuksa eg har tenkt å sy skal eg lage med litt kortare bein. Sånn ca midt på leggen.

12 jun

For 1500 kroner i garn!

Eg skal fortelle om den o-store-garnhandelen, men først vil eg vise fram nokre skinntøfler som eg har sydd siste dagane. Dei med navn på er forhåpentlegvis snart framme hjå sin nye eigar medan dei tre andre er ledige på markedet. Innermål hhv 11cm (lilla) og 12,5 cm (beige og burgunder). Vetlesysta som er 15 månader snart brukar tøfler som har 12,5 cm fotlengde no.

Buksa som tøflene ligg på er den samme som eg har vist fram her. Eg valgte å sprette av kanten nede og sy den på igjen som ribbekant. Nokså mykje meir praktisk, men kanskje ikkje like stilig. Her har det ført til at buksa har blitt brukt mykje i kjølige sommardagar og eg likte veldig godt korleis den vart sjåande ut.

Og så til garnhandelen. I går fekk eg garn frå svigerinna mi for heile 1500,- kroner! Herleg farge og mjukt og godt.

Pinne nr. 3-4 – 300m/50 g og eg har fire buntar.

1500,- kroner blir forresten ikkje heilt rett – KronUr er meire rett sidan handelen føregjekk på Island. Når man så regnar om til norske kroner har eg forhåpentlegvis ikkje ruinert henne heilt. Eg skal pønske ut eit eller anna ho kan få i bytte, og sidan ho får seg nytt hus etter kvart må det vel vere bruk for eit eller anna sydd der. Garnet skal få bli ein vest/topp (baby i rib eller nonstop kanskje) til vetlesysta – trur eg. Eller kanskje ein kjole/tunika etter inspirasjon frå det nydelige plagget Blomsterpiken har laga.

Kva syns du eg skal strikke av garnet?

08 jun

Sol sol kom igjen!

Ja, i dag har sola faktisk vore framme. Kanskje var det den blomstrete solhatten som lokka den fram ;) Hatten vart til medan vetlesysta sov formiddagslur og mønsteret er litt sånn frå her og der. Seks bua trekantar på ni cm breidde, inkludert ein halv cm saumrom på alle kantar, vart til pullen.

Til bremmen har eg brukt ei stripe på 90×9 cm (greie tal) bretta dobbel, sydd saman i kortendane og snurpa sammen til rett vidde – i dette tilfellet ca 48 cm. Monteringa vart i hovudsak gjort med overlock, men siste finish med symaskin. Under bremmen er det små øyreklaffar og snorer som held hatten godt på plass. Slike små er elles kjent for å nappe av hovudplagg nokså effektivt.

Kommentar?

03 jun

Huer til eittåring

Våren har vore kald og våt og dei to første dagane av juni har vore like eins. «I morgon» kjem nok sommaren, men enn så lenge treng vi både hue og jakke. Vetlesysta mangla ei god hue og eg har lenge tenkt å prøve å sy ei etter modell frå ei god strikkahue, og som tenkt så gjort.

Begge huene er i dobbelt stoff. Den eine er i bambusjersey og den eine med ytterside i bomullsjersey men med bambus innside. Vetlesysta er ca 47 cm rundt hovudet og desse passar perfekt. Passe trur eg forresten dei kjem til å gjere lenge, for det er stoff med god strekk i i begge to. Sydd med 3 trådars overlocksaum og med ein ørliten vendeopning i nakken sydd saman for hand. På den måten har dei ikkje vrangside og kan brukast med begge sider ut. Snorene er i hhv bambus og bomull og uten noko som helst kanting, men jersey raknar lite så eg reknar med dette går heilt fint.

Ja og så fekk eg vist fram vetlesysta òg ;)